अल्पवयीन मुलीवर बलात्कारप्रकरणी दोघांना अटक

चेंबूर, ता. १८ (बातमीदार) : शिधा कार्यालयातून रेशन कार्ड तयार करून देण्याचे प्रलोभन देऊन दोघांनी एका अल्पवयीन मुलीवर सामूहिक बलात्कार केल्याची घटना रविवारी (ता. १५) चेंबूर परिसरात घडली. याप्रकरणी टिळकनगर पोलिसांनी गुन्हा दाखल करून दोन आरोपींना अटक केली आहे.

अफताफ आझमी व अनिश चौधरी अशी अटक करण्यात आलेल्या आरोपींची नावे आहेत. उपनगर परिसरात पीडित मुलगी आपल्या कुटुंबासह राहत आहे. पीडितेला रेशन कार्ड हवे असल्याने ती कित्येक महिने शिधापत्रिका कार्यालयाचे उंबरठे झिजवत होती; मात्र तिला रेशन कार्ड मिळत नव्हते. याचदरम्यान एक जण रेशन कार्ड तयार करून देतो, अशी तिला माहिती मिळाली होती. त्यानुसार तिने आरोपीला संपर्क केला. आरोपीने मुलीला मदत करण्याच्या बहाण्याने एका ठिकाणी बोलावले. त्यानंतर या आरोपी आणि त्याच्या साथीदाराने या मुलीवर बलात्कार केला. त्यानंतर घाबरलेल्या पीडिताने ही बाब तत्काळ घरी सांगितली. त्यानुसार कुटुंबीयांनी टिळकनगर पोलिस ठाण्यात धाव घेत तक्रार दाखल केली. याप्रकरणी पोलिसांनी गुन्हा दाखल करून आरोपींना अटक केली आहे.