गोवेलीत महाआरोग्य शिबिर
टिटवाळा (वार्ताहर) : नवीन मराठी वर्षाच्या स्वागतानिमित्त ‘आरोग्यसेवेची गुढी’ उभारण्याच्या संकल्पातून गोवेली ग्रामीण रुग्णालय परिसरात बुधवारी (ता. २५) तालुकास्तरीय महाआरोग्य शिबिराचे आयोजन करण्यात आले आहे. आमदार किसन कथोरे यांच्या हस्ते या शिबिराचे उद्घाटन होणार असून, ठाणे जिल्हा परिषद आणि कल्याण पंचायत समितीच्या संयुक्त विद्यमाने हा उपक्रम राबविला जात आहे. या शिबिरात हृदयरोग, स्त्रीरोग, कॅन्सर, नेत्रविकार आणि बालरोगासह विविध आजारांवर तज्ज्ञ डॉक्टरांकडून मोफत तपासणी व सल्ला दिला जाणार आहे. ग्रामीण भागातील नागरिकांना एकाच छताखाली सर्व वैद्यकीय सुविधा उपलब्ध करून देणे, हा यामागचा मुख्य उद्देश आहे. सुमारे ५०० हून अधिक नागरिक या संधीचा लाभ घेतील, असा अंदाज वर्तवण्यात येत असून जास्तीत जास्त रुग्णांनी उपस्थित राहावे, असे आवाहन गटविकास अधिकारी रघुनाथ गवारी यांनी केले आहे.