निळज येथे श्री वाकडाई माता मंदिराचा प्रथम वर्धापनदिन उत्साहात
माणगाव, ता. २१ (वार्ताहर) ः माणगाव तालुक्यातील निळज येथे श्री वाकडाई माता मंदिराचा प्रथम वर्धापनदिन सोमवार (ता. १६) उत्साहात पार पडला. यानिमित्त दिवसभर विविध धार्मिक कार्यक्रमांचे आयोजन करण्यात आले होते.
सकाळपासूनच मंदिर परिसरात भाविकांची मोठी गर्दी पाहायला मिळाली. देवीचा अभिषेक सोहळा आणि श्रीसत्यनारायणाची महापूजा भक्तिमय वातावरणात पार पडली. त्यानंतर महाआरती व तीर्थप्रसादाचे वाटप करण्यात आले. यानंतर देवीच्या पालखी सोहळ्याने संपूर्ण परिसरात उत्साहाचे वातावरण निर्माण झाले. ग्रामस्थांनी पालखी नाचवत खालू बाजाच्या तालावर लेझीमचा ठेका धरला. रात्रीच्या भजन कार्यक्रमामुळे संपूर्ण गावात भक्तिमय वातावरण निर्माण झाले. या कार्यक्रमासाठी निळज, धरणाची वाडी, बौद्धवाडी, आदिवासीवाडी तसेच परिसरातील ग्रामस्थ आणि भाविक मोठ्या संख्येने उपस्थित होते.

फोटो :
माणगाव ः वाकडाई माता मंदिराचा वर्धापनदिन उत्साहात साजरा झाला.