श्रमिक विद्यालयात जागतिक वनदिन उत्साहात साजरा
वसुंधरा गीताने जिंकली उपस्थितांची मने
रोहा, ता. २२ (बातमीदार) ः रोहा तालुक्यातील नवजीवन शिक्षण प्रसारक मंडळ खांब संचलित श्रमिक विद्यालय चिल्हे येथे जागतिक वन दिवस उत्साहात साजरा करण्यात आला. झाडे लावा, झाडे जगवा व वसुंधरा वाचवा अशा पद्धतीने संदेश देणारे वसुंधरा गीत गाऊन विद्यार्थ्यांनी उपस्थितांचे मने जिंकली.
राष्ट्रीय हरित सेना व सामाजिक वनीकरण विभाग यांच्या संयुक्त विद्यमाने या कार्यक्रमाचे आयोजनक करण्यात आले होते. याप्रसंगी रोहा परिमंडळ वन अधिकारी व्ही. बी. जाधव, राज्य वन विभागाचे सोमनाथ चव्हाण, वन मजूर सुरेश वाघमारे, गोपीनाथ वाघमारे, मुख्याध्यापक दीपक जगताप, सहाय्यक शिक्षक सुनील थिटे, शशिकांत महाडिक, चंद्रशेखर कांबळे व हरित सेनेचे विद्यार्थी उपस्थित होते. या वेळी सर्वप्रथम लागवड केलेल्या वृक्षांच्या रोपांसमोर दीपप्रज्वलन करून पूजन करण्यात आले व रोपांना पुष्पमाला अर्पण केली. झाडे लावा, झाडे जगवा तसेच वसुंधरा वाचवा याबाबत संदेश देणारे वसुंधरा गीत गाऊन या कार्यक्रमाची सुरुवात करण्यात आली. विद्यार्थिनी आस्था थिटे आणि दिशा हळदे यांनी वन दिनाचे महत्त्व व वृक्षारोपण ही काळाची गरज याबाबत आपले मनोगत व्यक्त केले, तर वन विभागाचे अधिकारी सोमनाथ चव्हाण यांनीही पर्यावरण संवर्धन व संरक्षण तसेच जागतिक वन दिवसाबद्दल विद्यार्थीवर्गाला मार्गदर्शन केले.

फोटो कॅप्शन :
रोहा ः जागतिक वनदिनानिमित्ताने आयोजित कार्यक्रम उपस्थित वन अधिकारी, शिक्षक विद्यार्थीवर्ग.