जव्हारमध्ये रमजान ईद उत्साहात साजरी
ईदगाहत सामूहिक नमाज पठण

जव्हार, ता. २२ (बातमीदार) : मुस्लिम धर्मीयांनी शनिवारी (ता. २१) रमजान ईद उत्साहात साजरी केली. यंदा ईदचा नमाज जव्हारच्या ईदगाह मैदान येथे अदा करण्यात आला. जव्हार शहर व खेडोपाड्यातील मुस्लिमबांधवांनी नमाज पठण करून एकमेकांची गळा भेट घेत ईदच्या शुभेच्छा दिल्या. नमाजसाठी घरातील लहाग्यांपासून थोरा मोठल्यापर्यंत सर्वांनी नवीन वस्त्र परिधान करून नमाजसाठी उपस्थिती दर्शवली होती. ईदगाह येथील नमाजनंतर माजी उपनगराध्यक्ष दिलीप तेंडुलकर, माजी बांधकाम सभापती गणेश राजपूत आदींनी एकोप्याचे प्रतीक म्हणून हिंदूबांधवांनी मुस्लिमबांधवांना गुलाब पुष्प देऊन शुभेच्छा दिल्या.
दरम्यान, मुस्लिमबांधव कुटुंबासह एकमेकांना गळा भेट देण्यासाठी फिरताना दिसत होते. मोठी गर्दी करून रमजान ईद उत्साहात साजरी करण्यात आली. तसेच जव्हार हनुमान पॉइंट व सन्सेट पॉइंट येथे मुस्लिमबांधवांची गर्दी दिसत होती.