पोलिसांच्या जाळ्यात अडकला चोर

आरोपींवर १०६ हून अधिक गुन्ह्यांची नोंद

नालासोपारा, ता. २४ (बातमीदार) : नालासोपारा परिसरातील चेन स्नॅचिंग प्रकरणाचा पोलिसांनी यशस्वी उलगडा करत दोन सराईत आरोपींना अटक केली आहे. आरोपींवर १०६ हून अधिक गुन्हे दाखल असून, चोरीस गेलेली सोन्याची चेन गुजरातमधून जप्त करण्यात आली आहे.
बोळिंज पोलिस ठाण्यातील चेन स्नॅचिंग प्रकरणाचा पोलिसांनी छडा लावत दोन आरोपींना अटक केली. अतिफ मोबीन अन्सारी ऊर्फ मेंटल (४३) आणि साजीद शेख ऊर्फ बडा साजीद अशी अटकेतील आरोपींची नावे आहेत. १९ जानेवारीला विरार पश्चिम येथील कीर्ती पाटील यांची १३ ग्रॅम सोन्याची चेन हिसकावण्यात आली होती. या घटनेत त्यांना दुखापतही झाली होती. सीसीटीव्ही आणि तांत्रिक तपासाच्या आधारे पोलिसांनी आरोपींचा माग काढून त्यांना अटक केली. चोरीस गेलेली १२.३०० ग्रॅम सोन्याची चेन गुजरातमधील नवसारी येथून जप्त करण्यात आली. आरोपींवर मुंबई परिसरात १०६ हून अधिक गुन्हे दाखल असून, त्यांच्यावर मोक्काअंतर्गत कारवाई करण्यात आली आहे. पुढील तपास सुरू आहे.