दिलीप आमले यांना महारक्षक व्यसनमुक्ती पुरस्कार
नेरूळ, ता.२९ (बातमीदार) : समाजासाठी व्यसनमुक्ती जनजागृती गेल्या २५ वर्षांपासून सातत्याने कार्य करणाऱ्या समाज प्रबोधनकार दिलीप आमले यांना महारक्षक व्यसनमुक्ती पुरस्कार २०२६ जाहीर झाला आहे. नवी मुंबई उपप्रादेशिक कार्यालय व सारथी सुरक्षा यांच्या संकल्पनेतून हा पुरस्कार जाहीर करण्यात आला आहे. सोमवारी (ता.३०) वाशी येथील विष्णुदास भावे नाट्यगृहात राज्याचे अप्पर परिवहन आयुक्त भरत कळस्कर यांच्या हस्ते हा पुरस्कार वितरण सोहळा होणार आहे.
दिलीप आमले यांनी रिक्षाचालक बांधवांसह विद्यार्थ्यांमध्ये दारू, गोवा, मावा, गुटखा, सिगारेट यांसारख्या व्यसनांपासून दूर राहण्यासाठी मोफत मार्गदर्शन संवाद आयोजित करून मोठ्या प्रमाणात जनजागृती केली आहे. तसेच शाळा, महाविद्यालय, सामाजिक संस्था व युनियन येथे व्यसनमुक्ती कार्यक्रम राबवून समाज प्रबोधनाचे कार्य सातत्याने सुरू ठेवले आहे. त्यांच्या या साऱ्या कार्याची दखल घेत त्यांना हा पुरस्कार जाहीर करण्यात आल्याचे सांगण्यात आले आहे.