ट्रकच्या धडकेत २६ वर्षीय तरुणीचा मृत्यू

भिवंडी, ता. १ (वार्ताहर) : मुंबई-नाशिक महामार्गावर भरधाव वेगाने जाणाऱ्या एका अज्ञात ट्रकने दुचाकीला दिलेल्या धडकेत २६ वर्षीय तरुणीचा मृत्यू झाल्याची हृदयद्रावक घटना रविवारी रात्री घडली. चारुशीला ऊर्फ श्रद्धा गणेश शिंदे असे मृत तरुणीचे नाव असून, या अपघातामुळे परिसरात हळहळ व्यक्त होत आहे.
नारपोली पोलिसांनी दिलेल्या माहितीनुसार, रविवारी (ता. २९) रात्री ९.१५च्या सुमारास मुंबई-नाशिक महामार्गावरील माणकोली उड्डाणपुलाच्या पुढे हा अपघात झाला. एका अज्ञात ट्रकचालकाने आपले वाहन अतिशय वेगात आणि बेदरकारपणे चालवून दुचाकीच्या हँडलला जोरदार धडक दिली. या धडकेमुळे दुचाकीवरील प्रथमेश शिंदे (वय २६) आणि चारुशीला दोघेही रस्त्यावर फेकले गेले. दुर्दैवाने ट्रकचे चाक चारुशीलाच्या उजव्या पायावरून गेल्याने मोठ्या प्रमाणावर रक्तस्राव झाला आणि तिचा जागीच मृत्यू झाला. या अपघातप्रकरणी नारपोली पोलिस ठाण्यात अज्ञात ट्रकचालकाविरोधात गुन्हा दाखल करण्यात आला आहे. अपघात घडल्यानंतर चालक ट्रकसह पसार झाला असून, पोलिस सीसीटीव्ही फुटेजच्या आधारे त्याचा शोध घेत आहेत. महामार्गावरील अवजड वाहनांच्या वेगावर नियंत्रण मिळवण्याची मागणी आता नागरिक करीत आहेत.