अनधिकृत टपऱ्या हटवून रस्ते मोकळे
जोगेश्वरी पूर्वेत पालिकेची कारवाई
जोगेश्वरी, ता. २ (बातमीदार) : जोगेश्वरी पूर्व येथील सर्वोदयनगर परिसरात हेमा इंडस्ट्रिजसमोरील रस्त्यासह संपूर्ण भागातील अनधिकृत टपऱ्या, हातगाड्या आणि फुटपाथवरील अतिक्रमणाविरोधात पालिकेच्या निष्कासन विभागाने गुरुवारी सकाळी मोठी कारवाई केली.
पालिका ‘के पूर्व’ विभागाकडे या भागातील रस्ते व फुटपाथ व्यापून बसलेल्या भाजीविक्रेते, फेरीवाले आणि इतर अनधिकृत विक्रेत्यांविरोधात अनेक तक्रारी प्राप्त झाल्या होत्या. त्याची दखल घेत विभागाचे अधिकारी मॅन्युअल फर्नांडिस यांच्या मार्गदर्शनाखाली ही मोहीम राबविण्यात आली.
या कारवाईदरम्यान बस थांबे, मुख्य रस्ते आणि फुटपाथवरील अनधिकृत टपऱ्या, फलक व हातगाड्या हटवण्यात आल्या. तसेच फुटपाथवर ठेवलेला माल जप्त करण्यात आला. काही ठिकाणी बुलडोझरच्या सहाय्याने अतिक्रमण पूर्णपणे हटविण्यात आले. यापूर्वी अंधेरी पूर्वेतील पंपहाउस परिसरातील आघाडीनगर व विकासनगर येथेही अशाच प्रकारची कारवाई करण्यात आली होती. त्यामुळे ‘के पूर्व’ विभागात अतिक्रमणाविरोधात सातत्याने मोहीम राबविली जात असल्याचे स्पष्ट झाले आहे.
या कारवाईमुळे दीर्घकाळ अतिक्रमणामुळे अडथळा निर्माण झालेल्या बस थांबे आणि रस्ते मोकळे झाले असून, नागरिकांनी समाधान व्यक्त केले आहे. पुढील काळातही अशा कारवाया सुरू ठेवण्यात येणार असल्याचे प्रशासनाने स्पष्ट केले आहे.