वंचित घटकांना मदतीचा हात
विक्रमगड तालुक्यात आवश्यक वस्तूंचे वाटप

विक्रमगड, ता. २ (बातमीदार) ः डहाणू तालुक्यातील कोसेशरी, आंबेघर, धरमपूर, पावन परिसरातील गावांमध्ये १,१०१ लाभार्थींना आवश्यक वस्तूंच्या किटचे वाटप करण्यात आले. श्री सत्य साईबाबा ट्रस्टच्या वतीने हा उपक्रम राबवण्यात आला.
दुर्गम भागातील अनेक कुटुंबांना ‘अमृत कलश’ उपक्रमांतर्गत मोठा दिलासा मिळाला आहे. किटमध्ये रोजच्या जीवनासाठी आवश्यक असणाऱ्या धान्य, किराणा साहित्य व इतर मूलभूत वस्तूंचा समावेश होता. या वस्तूंमुळे अनेक कुटुंबांची दैनंदिन गरज काही प्रमाणात भागणार असल्याने नागरिकांमध्ये समाधानाचे वातावरण होते. या उपक्रमाला गावकऱ्यांनी मोठ्या संख्येने उपस्थित राहून उत्स्फूर्त प्रतिसाद दिला. अनेक लाभार्थींनी ट्रस्टचे आभार मानताना अशा उपक्रमांची ग्रामीण, आदिवासी भागात मोठी गरज असल्याचे सांगितले.
---------------------------
उत्स्फूर्त सहभाग
कार्यक्रमादरम्यान स्वयंसेवक, सेवेकरी यांनी किटचे वितरण केले. या वेळी शिस्तबद्ध, सुरळीत पार पडावा, यासाठी स्वयंसेवकांनी विशेष परिश्रम घेतले. या उपक्रमातून समाजातील वंचित घटकांना मदतीचा प्रयत्न करण्यात आला. या वेळी उपस्थित स्वयंसेवक, सेवेकऱ्यांनी सामाजिक उपक्रम करण्याचा मानस व्यक्त केला.