उलवे सेक्टर २४ मध्ये सांडपाण्याचे डबके
दुर्गंधीमुळे नागरिक त्रस्त!
उलवे, ता. २ (बातमीदार) : उलवे सेक्टर २४ येथे सांडपाण्याचे मोठे डबके साचल्यामुळे परिसरात तीव्र दुर्गंधी आणि अस्वच्छता निर्माण झाली आहे. संबंधित ठिकाणी गटारातील सांडपाणी रस्त्यालगत साचलेले असून त्यामध्ये कचरा, प्लास्टिक आणि गाळ जमा झाल्यामुळे परिस्थिती अधिकच बिकट झाली आहे. साचलेल्या पाण्याचा रंग काळपट झाला असून त्यातून दुर्गंधी पसरत आहे. रस्त्याच्या कडेला असलेली निचऱ्याची व्यवस्था पूर्णपणे निकामी झाल्याचे चित्र आहे. आजूबाजूला वाढलेली झाडाझुडपे आणि साचलेला कचरा यामुळे पाण्याचा प्रवाह अडथळला जात आहे.
या अस्वच्छतेमुळे डासांची उत्पत्ती वाढण्याची शक्यता असून डेंग्यू, मलेरिया यांसारख्या आजारांचा धोका निर्माण झाला आहे. तसेच, पादचारी आणि वाहनचालकांना या मार्गावरून जाताना मोठा त्रास सहन करावा लागत आहे. विशेषतः पावसाळ्यात ही समस्या अधिक गंभीर होण्याची भीती नागरिक व्यक्त करत आहेत. या समस्येबाबत अनेक वेळा संबंधित प्रशासनाकडे तक्रारी करण्यात आल्या आहेत, मात्र अद्याप कोणतीही ठोस उपाययोजना करण्यात आलेली नाही.
तरी संबंधित प्रशासनाने तात्काळ कारवाई करून सांडपाण्याचा निचरा सुरळीत करावा, साचलेला कचरा हटवावा आणि नियमित स्वच्छता मोहीम राबवावी, अशी मागणी परिसरातील नागरिकांकडून करण्यात येत आहे.