आरटीई प्रवेशासाठी २५ हजारांहून अधिक अर्ज
ठाणे, ता. ३ : शिक्षण हक्क कायद्यांतर्गत (आरटीई) २५ टक्के राखीव जागांवरील प्रवेश प्रक्रियेसाठी ठाणे जिल्ह्यात यंदा २५ हजार ५३ विद्यार्थ्यांचे अर्ज दाखल झाले आहेत. ठाणे महापालिका क्षेत्रातून सर्वाधिक प्रतिसाद मिळाल्याचे समोर आले आहे. यामध्ये ठाणे महापालिका हद्दीतून पाच हजार ४७० अर्ज प्राप्त झाले आहेत. शैक्षणिक वर्ष २०२६-२७ साठी आरटीई प्रवेश प्रक्रिया १७ फेब्रुवारीपासून सुरू झाली होती. अर्ज भरण्याची अंतिम मुदत ३१ मार्च होती. या कालावधीत एकूण ११ हजार ७५४ जागांसाठी प्रवेश प्रक्रिया राबविण्यात आली. पालकांना अर्ज करण्यासाठी तीन वेळा मुदतवाढही देण्यात आली होती. यंदा सुरुवातीला शाळा निवडताना एक किलोमीटर अंतराची अट लागू करण्यात आली होती. या अटीमुळे अनेक पालकांमध्ये संभ्रम निर्माण झाला आणि अर्जांचा वेग मंदावला. ग्रामीण भागातील विद्यार्थ्यांवर याचा अधिक परिणाम झाला. मात्र, उच्च न्यायालयाच्या निर्देशानुसार ही अट शिथिल करण्यात आल्यानंतर अर्जांचा ओघ पुन्हा वाढल्याचे दिसून आले.
…………………….
ग्रामीण भागातून मर्यादित प्रतिसाद
अट शिथिल केल्यानंतरही ग्रामीण भागातील प्रतिसाद अपेक्षेपेक्षा कमीच राहिला. कल्याण, मुरबाड, शहापूर, अंबरनाथ आणि भिवंडी तालुक्यांतून एकूण आठ हजार १९४ अर्ज प्राप्त झाले आहेत. यामध्ये अंबरनाथ तालुक्यातून सर्वाधिक अर्ज आले असून, मुरबाड तालुक्यातून केवळ २१५ अर्ज दाखल झाले आहेत.
………………………
महापालिका क्षेत्रनिहाय अर्जांची संख्या :
ठाणे – ५,४७०
नवी मुंबई – ५,३२६
कल्याण-डोंबिवली – ३,०९१
भिवंडी – १,७४१
उल्हासनगर – ६६९
मिरा-भाईंदर – ५६२
.....................
तालुकानिहाय अर्जांची संख्या :
कल्याण – २,६००
अंबरनाथ – २,८८२
भिवंडी – १,४७३
शहापूर – १,०२४
मुरबाड – २१५