खोपिवलीत रंगला पारंपरिक कुस्ती आखाडा
१५० वर्षांची परंपरा कायम
टोकावडे, ता. ५ (बातमीदार) : आधुनिक काळात पारंपरिक खेळांचा विसर पडत चालला असताना, मुरबाड तालुक्यातील खोपिवली गावाने आपली दीडशे वर्षांची कुस्तीची परंपरा यंदाही मोठ्या उत्साहात जपली. हनुमान जयंतीचे औचित्य साधून आयोजित करण्यात आलेल्या या कुस्ती आखाड्यात महाराष्ट्राच्या कानाकोपऱ्यातील मल्लांनी आपले बाहुबळ आजमावले.

गोरख-मच्छिंद्रगडाच्या पायथ्याशी वसलेल्या या गावात कुस्ती हा केवळ खेळ नसून तो लोकसंस्कृतीचा अविभाज्य भाग आहे. या आखाड्यात ठाणे, नाशिक, सातारा, सांगली, रायगड आणि पुणे या जिल्ह्यांसह राज्याबाहेरील नामांकित मल्लांनी हजेरी लावली होती. यंदाच्या स्पर्धेत पारंपरिक बक्षिसांसोबतच आधुनिक बक्षिसांचीही भर घालण्यात आली होती. रूपेश खाटेघरे यांच्या वतीने प्रथम पारितोषिकासाठी इलेक्ट्रिक दुचाकी देण्यात येणार आहे, तर काळुराम भांडे यांच्या वतीने द्वितीय पारितोषिक फ्रिज देण्यात येणार आहे. तसेच स्पर्धेसाठी चांदीची गदा, मानचिन्ह (ढाल) आणि पाच हजारांपासून २५ हजार रुपयांपर्यंतची रोख रक्कम देण्यात येणार आहे.

सांस्कृतिक उत्सव
केवळ कुस्तीच नव्हे, तर हनुमान जन्मोत्सवानिमित्त गावात भक्तीचा जागरही पाहायला मिळाला. ग्रामस्थ मंडळाच्या वतीने आयोजित अखंड हरिनाम सप्ताहात श्रीज्ञानेश्वरी पारायण, प्रवचन, कीर्तन आणि जागर भजनाचे कार्यक्रम संपन्न झाले. ग्रामीण भागात पारंपरिक खेळ मागे पडत असताना, खोपिवली गावाने गेल्या दीडशे वर्षांपासून हा वारसा टिकवून ठेवला आहे. या मातीने अनेक पैलवान दिले असून, ही ओळख जपण्यासाठी ग्रामस्थ एकजुटीने प्रयत्न करत आहेत.