टिटवाळ्यात वीजपुरवठा खंडित
नियोजित देखभाल कामांना वेग
टिटवाळा, ता. ७ (वार्ताहर) : परिसरातील वीजग्राहकांना मंगळवारी मोठ्या प्रमाणावर वीजखंडाचा सामना करावा लागला. १००/२२ केव्ही टाटा पॉवरकडून येणाऱ्या एनआरसी १ या मुख्य वाहिनीवर नियोजित शटडाऊन घेतल्यामुळे गोवेली स्विचिंग केंद्रातून निघणारे चारही आउटगोइंग फीडर सकाळी बंद ठेवण्यात आले होते. या नियोजित कामामुळे परिसरातील वीजपुरवठा काही काळ पूर्णपणे खंडित झाला होता.

शटडाऊनच्या या कालावधीचा उपयोग करून वीज विभागाने प्रलंबित देखभाल आणि दुरुस्तीची कामे युद्धपातळीवर पूर्ण केली. भविष्यातील तांत्रिक बिघाड टाळण्यासाठी उच्च दाब वाहिन्यांवरील जुने व जीर्ण झालेले जंपर बदलण्यात आले. तसेच पावसाळ्यापूर्वीची खबरदारी म्हणून वीजवाहिन्यांना अडथळा ठरू शकणाऱ्या झाडांच्या फांद्यांची (ट्री कटिंग) छाटणी करण्यात आली.

विविध फीडरवर स्वतंत्र कामे
मुख्य कामाव्यतिरिक्त २२ केव्ही मांडा फीडर आणि २२ केव्ही केडीएमसी फीडरवर मांडा ग्रामीण शाखेमार्फत स्वतंत्रपणे दुरुस्तीची कामे हाती घेण्यात आली होती. या कामांमुळे नागरिकांना तात्पुरत्या स्वरूपात गैरसोयीचा सामना करावा लागला असला तरी दीर्घकालीन स्थिर आणि सुरळीत वीजपुरवठ्यासाठी ही कामे अत्यावश्यक असल्याचे महावितरणच्या अधिकाऱ्यांनी स्पष्ट केले आहे.