मुंब्र्यात बसच्या धडकेत दोन तरुणांचा मृत्यू
एक जण गंभीर जखमी

सकाळ वृत्तसेवा
ठाणे, ता. ७ : मुंब्रा येथील एम. एम. व्हॅली परिसरात आज दुपारी झालेल्या भीषण अपघातात दोन तरुणांचा मृत्यू झाला, तर एक जण गंभीर जखमी झाला. हे तिघे एकाच दुचाकीवरून जाताना खासगी बसने त्यांना मागून धडक दिल्याची माहिती मुंब्रा पोलिसांनी दिली.
पोलिसांनी दिलेल्या माहितीनुसार, एकाच दुचाकीवरून संगम राजेश पुलशरे (२१), अविनाश रामदास दवंडे (१९) आणि महेश भगवान वारे (१८) हे मुंब्रा ठाकूरपाडा, सम्राटनागर येथे राहणारे तिघे रोशनी महल येथून वाय जंक्शनकडे जात होते. त्या वेळी खासगी बसचा चालक मुस्तफा हुसेन शेख (५८, रा. रेतीबंदर) याने पाठीमागून येत दुचाकीला जोरदार धडक दिली. दुचाकी त्या धडकेमुळे बसच्या पुढील चाकाखाली आल्याने ते गंभीर जखमी झाले. यामध्ये संगम पुलशरे आणि अविनाश दवंडे यांचा मृत्यू झाला, तर महेश वारे हा जखमी झाला. महेशवर महापालिका रुग्णालयात उपचार सुरू आहेत. याप्रकरणी गुन्हा दाखल केल्याची माहिती वरिष्ठ पोलिस निरीक्षक अनिल शिंदे यांनी दिली.