ठाणे, ता. १२ : कळवा परिसरातील हॉटेलमध्ये सुरू असलेल्या देहविक्री रॅकेटवर ठाणे शहर पोलिसांच्या अनैतिक मानवी वाहतूक प्रतिबंध कक्षाने कारवाई करत एका महिला दलालाला अटक केली. या कारवाईत दोन पीडित मुलींची सुटका करण्यात आली.
वरिष्ठ पोलिस निरीक्षक वैशाली गोरडे यांना मिळालेल्या गोपनीय माहितीनुसार, रेती बंदर सर्कलजवळील हॉटेल अमित गार्डन येथे देहविक्रीसाठी मुलींना आणण्यात येणार असल्याचे समजले. त्यानुसार शुक्रवारी (ता. १०) सापळा रचून ही कारवाई करण्यात आली. याप्रकरणी कळवा पोलिस ठाण्यात गुन्हा दाखल केला असून, अटक केलेल्या महिला दलालाला न्यायालयाने १३ एप्रिलपर्यंत पोलिस कोठडी सुनावली आहे. सुटका केलेल्या दोन्ही पीडित मुलींना उल्हासनगर-५ येथील शांतीसदन सुरक्षा गृहात ठेवण्यात आल्याची माहिती पोलिसांनी दिली.