मुंबई, ता. १९ : महाराष्ट्र राज्य सहकारी संघाअंतर्गत सातारा जिल्हा सहकारी बोर्ड, सातारा जिल्हा मध्यवर्ती सहकारी बँक व जिल्हा उपनिबंधक, सहकारी संस्था यांच्या संयुक्त विद्यमाने सातारा जिल्हा सहकारी बोर्डाच्या अद्ययावत सहकार प्रशिक्षण सभागृहाचे उद्‍घाटन सोमवारी (ता. २०) सार्वजनिक बांधकाम मंत्री शिवेंद्रराजे भोसले आणि महाराष्ट्र राज्य सहकारी संघाचे अध्यक्ष आमदार प्रवीण दरेकर यांच्या हस्ते होईल.

कार्यक्रमाच्या अध्यक्षस्थानी सातारा जिल्हा सहकारी बँकेचे अध्यक्ष व माजी खासदार नितीन जाधव (पाटील) असतील. सातारा जिल्हा सहकारी बोर्ड, सहकार मंदिर, अजिंक्य कॉलनी, कॅम्प सातारा येथे पार पडणाऱ्या या उद्‍घाटन सोहळ्याला कोल्हापूर जिल्हा सहकारी बोर्डाचे अध्यक्ष व माजी खासदार संजय मंडलिक यांची विशेष उपस्थिती असणार आहे. तर प्रमुख पाहुणे म्हणून राष्ट्रीय मजूर सहकारी संघाचे अध्यक्ष (दिल्ली) संजीव कुसाळकर आदी उपस्थित राहणार आहेत, असे महाराष्ट्र राज्य सहकारी संघाचे संचालक व निमंत्रक धनंजय शेडगे यांनी सांगितले.