झाडांची नासधूस रोखण्यासाठी नागरिकांनी पुढे यावे
ऑक्सिजन पार्क आगीनंतर पालिकेचे आवाहन
तुर्भे ता. १९ (बातमीदार) : नवी मुंबईतील बेलापूर येथील पारसिक हिल टेकडीवर मोठ्या प्रमाणावर करण्यात आलेल्या वृक्षलागवडीला काही असामाजिक घटकांकडून धोका निर्माण होत असल्याचे समोर आले आहे. जुलै २०२५ मध्ये आगाखान एजन्सी फॉर हॅबिटॅटच्या माध्यमातून येथे ३० हजारांहून अधिक भारतीय प्रजातींच्या झाडे, झुडपे आणि गवताची त्रिस्तरीय लागवड करण्यात आली होती. या उपक्रमामुळे परिसरात ‘ऑक्सिजन पार्क’ निर्माण होऊन जैवविविधतेत लक्षणीय वाढ झाली आहे.
मात्र अलीकडच्या काळात झाडांच्या फांद्या तोडणे, फुले तोडणे तसेच लागवड क्षेत्रातील गवताला आग लावण्याचे प्रकार घडत आहेत. विशेषतः ५ मार्च २०२६ रोजी लागलेल्या आगीत अनेक झाडांचे नुकसान झाले असून, पाण्याची ड्रीप लाइनही जळून खाक झाली. या घटनेनंतर संबंधित संस्थेकडून तातडीने दुरुस्ती करून पाणीपुरवठा पूर्ववत करण्यात आला असून, बाधित झाडांना नियमित पाणी दिले जात आहे.
उद्यान उपायुक्त स्मिता काळे यांनी नागरिकांना आवाहन करताना सांगितले की, वृक्षसंवर्धन ही केवळ प्रशासनाची नव्हे, तर प्रत्येकाची सामूहिक जबाबदारी आहे. पर्यावरण रक्षणासाठी नागरिकांनी सतर्क राहून अशा प्रकारांना आळा घालावा. या वेळी अधीक्षक प्रकाश गिरी आणि उद्यान सहाय्यक राज बांगर यांनीही पाहणी करून आवश्यक उपाययोजनांचा आढावा घेतला.