ॲग्नेल पॉलिटेक्निकमध्ये करिअर सेमिनार
३०० पालकांची उपस्थिती; दहावीनंतरच्या करिअर संधी व प्रवेश प्रक्रियेवर सविस्तर मार्गदर्शन

नवी मुंबई, ता. १९ (वार्ताहर) : वाशीतील ॲग्नेल पॉलिटेक्निक येथे शनिवारी (ता. १८) आयोजित करण्यात आलेल्या करिअर मार्गदर्शन सेमिनारला पालक व विद्यार्थ्यांचा उत्स्फूर्त प्रतिसाद लाभला. सुमारे ३०० पालकांच्या उपस्थितीत पार पडलेल्या या कार्यक्रमात दहावीनंतरच्या विविध करिअर संधी तसेच प्रवेश प्रक्रियेबाबत सविस्तर मार्गदर्शन करण्यात आले.
संवादात्मक पद्धतीने आयोजित या सत्रात प्राचार्या व प्राध्यापकांनी अभ्यासक्रमांची माहिती, उपलब्ध सुविधा आणि विद्यार्थ्यांसाठी असलेल्या सहाय्य प्रणालींबाबत सखोल माहिती दिली. पालकांनीही सक्रिय सहभाग नोंदवत विविध प्रश्न विचारले, ज्यांची समाधानकारक उत्तरे देण्यात आली. त्यामुळे पालकांना आपल्या पाल्यांच्या भविष्यासाठी योग्य व माहितीपूर्ण निर्णय घेण्यास मदत झाली.
या वेळी व्यवस्थापकीय संचालक पीटर डिसूझा, प्राचार्या श्रीमती सॅली अँटनी तसेच प्राध्यापक उपस्थित होते. विद्यार्थ्यांच्या शैक्षणिक प्रगतीस चालना देण्यासाठी आणि पालक-शैक्षणिक संस्था यांच्यातील समन्वय अधिक दृढ करण्यासाठी अशा उपक्रमांचे आयोजन पुढेही करण्यात येणार असल्याचे संस्थेकडून सांगण्यात आले.