कारखान्याची भिंत फोडून साडेतीन लाखांची चोरी
खालापूर (बातमीदार) ः खालापूर तालुक्यातील नढाळ गाव येथील एका कारखान्यात चोरट्यांनी धाडसी चोरी केल्याची घटना उघडकीस आली आहे. कारखान्याच्या संरक्षक भिंतीला भगदाड पाडून चोरट्यांनी सुमारे तीन लाख ३६ हजार ५९५ रुपये किमतीचे साहित्य लांबवले आहे. एसजीबी ब्रँड सेफ वे प्रायव्हेट लिमिटेड कारखान्याचे व्यवस्थापक विनोद ठाकूर यांनी याप्रकरणी तक्रार दिली आहे. कारखान्याच्या मोकळ्या जागेत फोर्म वर्क मटेरियल पॅनेल ठेवले होते. चोरट्यांनी रात्रीच्या वेळेस संरक्षक भिंतीला भगदाड पाडून प्रवेश केला आणि तीन लाख ३६ हजार ५९५ रुपयांचा माल चोरून नेला. याप्रकरणी अज्ञात चोरट्याविरुद्ध गुन्हा दाखल करण्यात आला असून, पोलिस उपनिरीक्षक नितीन सांगळे पुढील तपास करत आहेत.