गणेश मंदिराचा भूमिपूजन सोहळा
विक्रमगड (बातमीदार)ः अक्षय तृतीयेच्या शुभ मुहूर्तावर देहर्जे (गोंडपाडा) येथे श्री गणेश मंदिराच्या भूमिपूजनाचा सोहळा विक्रमगड विधानसभा मतदारसंघाचे विद्यमान आमदार हरिश्चंद्र भोये यांच्या उपस्थितीत पार पडला. यावेळी वेदमंत्रांच्या गजरात, पारंपरिक विधी-विधानांनुसार भूमिपूजन करण्यात आले. या सोहळ्याला मोठ्या संख्येने ग्रामस्थ उपस्थित होते. मंदिरामुळे गावात धार्मिक, सांस्कृतिक उपक्रमांना चालना मिळेल तसेच भक्तांसाठी श्रद्धास्थान ठरेल, असा विश्वास व्यक्त करण्यात आला. या कार्यक्रमाला पालघर जिल्हा सरचिटणीस सुशील औसरकर, माजी कृषी-पशुसंवर्धन सभापती संदीप पावडे, भाजप ज्येष्ठ नेते प्रवीण संखे उपस्थित होते.