विक्रमगड, ता. २२ (बातमीदार) : तालुक्यात विविध कारणांनी रिक्त झालेल्या ग्रामपंचायतींच्या जागांसाठी पोटनिवडणूक जाहीर झाली आहे. यासाठी १३ एप्रिलपर्यंत नामनिर्देशनपत्रे भरण्यात आली आहेत. उमेदवारी अर्ज मागे घेण्याच्या दिवशी काही उमेदवारांनी आपले अर्ज माघारी घेतल्याने सहा जागा बिनविरोध, तर तीन जागा उमेदवारांअभावी रिक्त राहिल्या आहे.

विक्रमगड तालुक्यातील वेढेचरी, मोह बुद्रुक, दाददे, सारंशी, खुडेद, सुकसाळे या ठिकाणी बिनविरोध उमेदवार निवडून आले आहेत. म्हसरोळी, उपराळे, साखरे या तीन जागा उमेदवारांअभावी रिक्त राहिल्या आहेत, तर आंबेघर तर्फे धरमपूर या ग्रामपंचायतीच्या एका जागेसाठी थेट लढत होणार आहे. खोस्ते सरपंचपदासाठी ही पोटनिवडणूक होत असून दोन उमेदवार रिंगणात आहेत. या ग्रामपंचायतींच्या पोटनिवडणुकीचे मतदान २८ एप्रिलला होणार असून ग्रामीण भागातील स्थानिक नेतृत्वाला ही निवडणूक एक मोठी संधी आहे.