अंबरनाथ (वार्ताहर) : शहराच्या पश्चिमेकडील जुन्या पोलिस ठाण्यासमोरील चौकाला ‘महाराणा प्रताप चौक’ असे नाव देण्याची मागणी स्थानिक राजपूत समाजाच्या वतीने करण्यात आली आहे. यासंदर्भात शिवसेना नगरसेवक विकास हेमराज सोमेश्वर यांच्या माध्यमातून नगराध्यक्ष तेजश्री करंजुले पाटील यांना निवेदन देण्यात आले आहे. कल्याण-बदलापूर रोड, फातिमा रोड आणि जुन्या पोलिस ठाण्यासमोरील हा महत्त्वाचा चौक अद्याप नामनिर्देशित नसल्याने या चौकाला ऐतिहासिक आणि प्रेरणादायी व्यक्तिमत्त्वाचे नाव देण्यात यावे, अशी भावना नागरिकांमध्ये व्यक्त होत आहे. भारताच्या महान सुपुत्राच्या स्मरणार्थ संबंधित चौकाला ‘महाराणा प्रताप चौक’ असे नाव देण्यात यावे तसेच त्या ठिकाणी नामफलक लावण्याची मागणी केली. यासंदर्भातील निवेदन मुख्याधिकारी उमाकांत गायकवाड, उपनगराध्यक्ष सदाशिव पाटील, भाजप गटनेते अभिजित करंजुले पाटील तसेच शिवसेना गटनेते रवींद्र करंजुळे यांना दिले.