खारघर, ता. ६ (बातमीदार) : मुंबईहून विदर्भातील पुसद, दिग्रस या भागांकडे जाणाऱ्या खासगी बस कंपन्यांनी तिकीट दरात अचानक दुप्पट वाढ केल्याने सर्वसामान्य प्रवाशांमध्ये तीव्र नाराजी व्यक्त होत आहे. उन्हाळ्याच्या सुट्ट्या आणि लग्नसराईचा हंगाम सुरू असल्याने प्रवाशांची मोठी गर्दी होत आहे. याच संधीचा फायदा घेत ट्रॅव्हल्स चालकांकडून मनमानी दर आकारले जात असल्याची तक्रार प्रवाशांनी केली आहे.

विदर्भातील यवतमाळ आणि वाशिम जिल्ह्यातील पुसद, दिग्रस, दारव्हा, मनोरा, मालेगाव आदी तालुक्यातील बहुतांश नागरिक हे नवी मुंबई, पनवेल परिसरात नोकरी, व्यवसाय आणि कामानिमित्त वास्तव्यास आहेत. विशेष म्हणजे सदर भागात पोहोचण्यासाठी अकोला आणि नांदेड मार्गावर रेल्वे आहे. मात्र रेल्वे प्रवासानंतर शंभर ते सव्वाशे किलोमीटर बस अथवा खासगी बसने प्रवास करावा लागत असल्यामुळे प्रवासी ट्रॅव्हल्सला अधिक पसंदी देतात. त्यात वाशीम, पुसद, दिग्रस, दारव्हा आदी भागातून मोठ्या प्रमाणात बस सुरू केल्यामुळे प्रवासी थेट तालुक्याचा ठिकाणी सेवा उपलब्ध असल्यामुळे खासगी वाहनांनी जातात.

नियमितपणे खासगी बसचे तिकीट ८०० ते १००० रुपयांदरम्यान आहे. आता हा तिकीट दर आता १५०० ते २००० रुपयांपर्यंत पोहोचले आहेत. अचानक झालेल्या या वाढीमुळे कुटुंबासह प्रवास करणाऱ्या नागरिकांना मोठा आर्थिक फटका बसत आहे. विशेषतः नोकरदार वर्ग, विद्यार्थी आणि ग्रामीण भागातील प्रवासी यांना याचा सर्वाधिक फटका बसत असल्याचे दिसून येते.