सभागृह नेतेपदी रवी व्यास यांची निवड

भाईंदर, ता. ७ (बातमीदार) : मिरा-भाईंदर पालिकेच्या सभागृह नेतेपदी भाजपचे ॲड. रवी व्यास यांची निवड करण्यात आली आहे. तर विरोधी पक्षनेतेपदी सय्यद आफरीन मुझफ्फर हुसेन यांची नियुक्ती करण्यात आली आहे. महापौर डिंपल मेहता यांनी दोघांच्या नावाची घोषणा केली.
महापालिका निवडणुकीत भाजपने एकहाती सत्ता स्थापन केली. त्यानंतर पक्षाकडून सभागृह नेतेपदी कोणाची निवड होणार, याबाबत उत्सुकता होती. पक्षाने रवी व्यास यांना हे पद दिले आहे. व्यास यांनी याआधी महापालिकेचे स्थायी समिती सभापतिपद सांभाळले आहे. सध्या मिरा-भाईंदर विधानसभा मतदारसंघ प्रमुख म्हणून कार्यरत आहेत. विधानसभा निवडणुकीत पक्षाकडून निवडणूक लढवू इच्छित होते; मात्र नरेंद्र मेहता यांना उमेदवारी दिली गेली होती. त्यामुळे सभागृह नेतेपद देऊन समतोल साधला गेल्याचे बोलले जात आहे.
-----------------------
तरुण नगरसेविकेवर जबाबदारी
विरोधी पक्षनेतेपदाची जबाबदारी कॉँग्रेसच्या प्रथमच निवडून आलेल्या तरुण नगरसेविका आफरीन हुसेन यांच्या खांद्यावर देण्यात आली आहे. काँग्रेसचे वरिष्ठ नेते मुझफ्फर हुसेन यांच्या कन्या आहेत. तसेच महाराष्ट्र प्रदेश युवक कॉँग्रेसच्या उपाध्यक्ष म्हणून कार्यरत आहेत.