जुईनगर, ता. ८ (बातमीदार) : मुंबईतील पायधुनी परिसरातील डोकाडिया परिवारातील चार जणांच्या मृत्यूचे कारण कलिंगड नसून उंदराचे औषध असल्याचे स्पष्ट झाले आहे. त्यामुळे कलिंगड उत्पादक शेतकरी आणि व्यापाऱ्यांमध्ये समाधानाचे वातावरण निर्माण झाले आहे.

गेल्या काही दिवसांपासून या कुटुंबातील सदस्यांचा मृत्यू कलिंगड खाल्ल्यामुळे झाल्याच्या बातम्या विविध प्रसारमाध्यमांतून झपाट्याने प्रसारित झाल्या होत्या. या बातम्यांचा थेट परिणाम मुंबईतील कलिंगड बाजारावर झाला होता. या घटनेमुळे ग्राहकांमध्ये भीतीचे वातावरण निर्माण झाले होते. परिणामी कलिंगड खरेदीत मोठी घट झाली आणि बाजारातील मागणी अचानक कमी झाली. विक्री ठप्प झाल्याने कलिंगडाचे भाव प्रतिकिलो तब्बल १० ते १५ रुपयांनी घसरले. त्यामुळे व्यापारी आणि कलिंगड उत्पादक शेतकऱ्यांचे मोठ्या प्रमाणावर आर्थिक नुकसान झाले.

परिणामी बाजारात मोठ्या प्रमाणावर माल पडून राहिला होता. विक्रीअभावी अनेकांना माल कमी भावात विकावा लागला, तर काही ठिकाणी माल खराब होण्याची वेळ आली. उन्हाळ्यात सर्वाधिक मागणी असलेल्या कलिंगड बाजाराला या घटनेचा मोठा फटका बसला होता. त्यामुळे इतर रसाळ फळांच्या भावात प्रचंड वाढ झाली होती. मात्र, आता काहीअंशी व्यापारात वृद्धी होण्याचे संकेत व्यापाऱ्यांनी दिले आहेत.
मात्र, आता नव्या माहितीनुसार संबंधित मृत्यूचे कारण उंदराचे औषध असल्याचे समोर आल्यानंतर ग्राहकांमधील संभ्रम कमी होऊ लागला आहे. त्यामुळे बाजारात पुन्हा सकारात्मक वातावरण तयार होत असून, येत्या काही दिवसांत कलिंगड विक्री पूर्वपदावर येईल, तसेच भावातही स्थिरता निर्माण होईल, अशी अपेक्षा व्यापारी व्यक्त करत आहेत. व्यापाऱ्यांनी नागरिकांना खात्रीशीर माहितीलाच महत्त्व देण्याचे आवाहन केले आहे. तसेच कलिंगड हे उन्हाळ्यातील सुरक्षित आणि आरोग्यदायी फळ असल्याचेही त्यांनी नमूद केले.

आम्हाला पूर्णपणे विश्वास होता की, संबंधित घटना कलिंगड खाल्ल्याने झाली नसावी. मात्र, तरीदेखील जोपर्यंत घटनेचे सत्य समोर येत नाही, तोपर्यंत कोणताही अंदाज बांधणे योग्य नसल्याने आम्हीदेखील काळजीत होतो. आता लवकरच बाजार सुरळीत होईल, अशी आशा आहे.
- विश्वजीत सिंग, कलिंगड व्यापारी