लोकअदालतमध्ये वाहतूक नियमभंग प्रकरणांचा निपटारा
१० लाखांपेक्षा अधिक दंड वसूल
मुलुंड, ता. ११ (बातमीदार) ः मुलुंड वाहतूक विभागाच्या वतीने शनिवारी (ता. ९) मुलुंड पश्चिमेतील तहसील कार्यालय येथे आयोजित लोकअदालतमध्ये वाहतूक नियमभंगाशी संबंधित प्रकरणांचा मोठ्या प्रमाणावर निपटारा करण्यात आला.
या विशेष उपक्रमांतर्गत वाहतूक विभागाने एकूण ११४ प्रकरणे न्यायालयासमोर सादर केली होती. सुनावणीनंतर न्यायालयाने संबंधित वाहनचालकांवर दंडात्मक कारवाईचे आदेश दिले. या कारवाईतून एकूण १० लाख चार हजार ५०० रुपयांचा दंड वसूल करण्यात आल्याची माहिती मुलुंड वाहतूक विभागाचे वरिष्ठ पोलिस निरीक्षक महेश तांबे यांनी दिली. सिग्नल तोडणे, हेल्मेट न वापरणे, चुकीच्या पद्धतीने वाहन चालवणे, बेकायदेशीर पार्किंग अशा विविध नियमभंगाच्या प्रकरणांवर दंड आकारण्यात आला. न्यायालयाच्या आदेशानुसार संबंधितांनी दंड तत्काळ भरला.