ठाणे, ता. १२ : ठाणे पश्चिमेतील शिवाईनगर परिसरात एका २३ वर्षीय प्रवीण वानखेडे या तरुणाने झाडाला गळफास घेऊन आत्महत्या केल्याची घटना मंगळवारी (ता. १२) सकाळी समोर आली. ही घटना हनुमान मंदिराजवळ घडली असून मृतदेह पोलिसांच्या ताब्यात देण्यात आला आहे. ठाणे महापालिकेच्या आपत्ती व्यवस्थापन कक्षाला मंगळवारी सकाळी या घटनेची माहिती मिळताच वागळे अग्निशमन केंद्राचे स्थानक अधिकारी पष्टे, वर्तकनगर पोलिस कर्मचारी तसेच अग्निशमन दलाचे जवानांनी घटनास्थळी धाव घेतली. अग्निशमन दलाच्या जवानांनी मृतदेह झाडावरून खाली उतरवून तो वर्तकनगर पोलिसांच्या ताब्यात दिला. त्यानंतर पोलिसांच्या उपस्थितीत मृतदेह शववाहिकेतून पुढील तपासणी आणि आवश्यक कार्यवाहीसाठी ठाणे जिल्हा शासकीय रुग्णालयात पाठविण्यात आला. तरुणाच्या आत्महत्येचे कारण अद्यापही स्पष्ट झालेले नाही, असे आपत्ती व्यवस्थापन कक्षेने सांगितले. याप्रकरणी वर्तकनगर पोलिस तपास करीत आहेत.