सकाळ वृत्तसेवा
ठाणे, ता. १५ : अमली पदार्थांच्या विळख्यात तरुणाई अडकू नये, यासाठी ठाणे पोलिसांनी आता थेट तरुणाईचीच ‘फौज’ मैदानात उतरवली आहे. १७१ शाळांमधील तब्बल २८ हजारांहून अधिक विद्यार्थ्यांनी ‘ड्रग्जला नकार, जीवनाला होकार’चा नारा देत व्यसनाविरोधात आवाज बुलंद केला. पोलिसांचे भाषण ऐकण्यापुरते हे अभियान मर्यादित न ठेवता विद्यार्थ्यांच्या हातातील मोबाईल, कॅमेरा आणि त्यांच्या कल्पनाशक्तीलाच जनजागृतीचे हत्यार बनविण्यात आले आहे. अभिनेते मकरंद अनासपुरे, विजू माने, संतोष जुवेकर आणि कुशल बद्रिके यांनी विद्यार्थ्यांशी संवाद साधत अमली पदार्थांपासून दूर राहण्याचे आवाहन केले.

परिमंडळ-१च्या पुढाकाराने नौपाडा, ठाणेनगर, राबोडी, कळवा, मुंब्रा आणि शीळ-डायघर परिसरातील शाळांना या अभियानाशी जोडण्यात आले. व्हिडिओ कॉन्फरन्सच्या माध्यमातून हजारो विद्यार्थी सहभागी झाले. ‘नशामुक्त भारत, नशामुक्त ठाणे’ हे उद्दिष्ट ठेवून विद्यार्थ्यांना शिक्षण, खेळ, कला आणि कौशल्याच्या दिशेने जाण्याचा संदेश देण्यात आला. ठाणे शहर पोलिस आयुक्त आशुतोष डुंबरे, सहपोलिस आयुक्त ज्ञानेश्वर चव्हाण, अपर पोलिस आयुक्त अशोक दुधे, उपायुक्त बाळासाहेब पाटील यांच्यासह वरिष्ठ अधिकारी उपस्थित होते.

आता ‘रील’मध्ये दिसणार ड्रग्जविरोधी लढा!
११ ऑक्टोबरपर्यंत अभियानाचा पुढचा टप्पा रंगणार आहे. लघु (रील) व्हिडिओ, पोस्टर, डिजिटल पोस्टर, मुक्त व्यासपीठ, कविता, अभिवाचन, पथनाट्य आणि लघुनाटिका अशा स्पर्धांमधून विद्यार्थी व्यसनाविरोधी संदेश स्वतःच्या शैलीत मांडणार आहेत.

‘युवकांकडून युवकांसाठी’ संदेश
या मोहिमेचा सर्वात वेगळा भाग म्हणजे एका विद्यार्थ्याने दुसऱ्या विद्यार्थ्याला व्यसनापासून दूर राहण्याचा संदेश देणे. उत्कृष्ट रील, पोस्टर आणि सादरीकरणे सोशल मीडिया व प्रसारमाध्यमांतून प्रसिद्ध केली जाणार आहेत. विजेत्यांना रोख पारितोषिक, ट्रॉफी आणि प्रमाणपत्र देण्यात येणार आहे. ‘अमली पदार्थांना नकार द्या; जीवनाला स्वीकारा!’ हा संदेश घेऊन या अभियानात विद्यार्थी, पालक आणि नागरिकांनी मोठ्या संख्येने सहभागी व्हावे, असे आवाहन पोलिस उपायुक्त बाळासाहेब पाटील यांनी केले आहे.