मुंबई - चलो चले कही दूर चले... प्यार के लिये ये भीड ठिक नाही, असे म्हणत शहराच्या गर्दीतून बाहेर पडत एकातांत ‘व्हॅलेंटाईन डे’ साजरा करण्याचा मुंबईतील प्रेमीयुगुलांचा ट्रेंड गेल्या काही वर्षांपासून वाढू लागला आहे. नवा ट्रेंड टुरिंग कंपन्यांनीही कॅश केला असून रेवदंड्याचा समुद्रकिनारा, इगतपुरीचा नदीकिनारा आणि पुण्याजवळील पवना धरण परिसरापासून बोर्डी-डहाणूच्या चिकूच्या बागेतही ‘कॅम्पिंग’ होणार आहे... हा झाला खिसा भरलेल्यांचा प्रेमदिनाचा बेत. कॉलेजमध्ये शिकणाऱ्या आणि पॉकेटमनीवर दिवस काढणाऱ्या कुमार-कुमारींचा ‘व्हॅलेंटाईन डे’ कॉफी शॉपमध्ये गुलाब आणि टेडीबिअरच्या गिफ्टनेच पूर्ण होणार आहे.

गुरुवारी (ता. १४) प्रेम दिवस जगभरात साजरा होईल. मुंबईतल्या गर्दीत प्रेमवीरांना एकांत मिळणे कठीण झाले आहे. ज्यांचा खिसा खुळखुळतोय, अशा प्रेमींनी मुंबईबाहेर जाण्याबरोबरच पंचतारांकित हॉटेलात वाईनबरोबर सेलिब्रेशन करण्याचे प्लॅन केले आहेत. अशा युगुलांसाठी मुंबईतील काही पंचतारांकित हॉटेलांमध्ये विशेष पॅकेजही तयार करण्यात आले आहेत. एकमेकांच्या साथीत काही तास गप्पागोष्टी करण्यासाठी काही हजार मोजण्याची अनेकांची तयारी आहे. ज्यांना दिवसभर एकांत हवा आहे, त्यांनी मुंबईबाहेर जाण्याचा निर्णय घेतला आहे. त्यासाठी हॉटेलऐवजी निसर्गाच्या सान्निध्यात राहण्याचा पर्याय त्यांनी निवडला आहे. ‘मुंबईत प्रचंड गर्दी असते. थोडासा एकांत हवा म्हणून काही पैसे खर्च करून मुंबईबाहेर जाणार आहोत,’ असे मंगेश शहा यांनी सांगितले.

छोट्याशा भेटीनेही ‘ती’ खुलते!
कॉलेजमध्ये शिकणाऱ्या तरुण-तरुणींची पसंती आजही गुलाब, टेडीबिअर, मुंबईचे समुद्रकिनारे किंवा कॉफी शॉपलाच आहे. ‘खिसा तंग असताना ‘ती’ला आवडणारी एखादी लहानशी वस्तू भेट दिली तरी चालून जाते’ असे अद्वैत कर्णिक याने सांगितले.