मुंबई - वरळी बीडीडी चाळीच्या पुनर्वसन प्रकल्पाच्या आराखड्यावरून स्थानिकांमध्ये संभ्रम आहे. तसेच सुधारित आराखड्यात वाढविण्यात आलेल्या मजल्यांवरूनही आक्षेप आहेत. त्यामुळे स्थानिकांन आणि मनसे अध्यक्ष राज ठाकरे यांनी प्रकल्प आराखड्याचे सादरीकरण करावे अशी मागणी मुख्यमंत्री एकनाथ शिंदे आणि म्हाडाकडे केली होती. या मागणीला यश आले असून आज (ता.११) रोजी वरळीत पुनर्वसन प्रकल्पाचे सादरीकरण करण्यात येणार असल्याची माहिती म्हाडा मुंबई मंडळाचे मुख्य अधिकारी यांनी दिली आहे.

दरम्यान, वरळीतील नागरिकांचा वरळी बीडीडी चाळ पुनर्वसन प्रकल्प आराखड्यातील काही बाबींबाबत आक्षेप आणि संभ्रम आहे. याबाबत नागरिकांनी मनसे अध्यक्ष राज ठाकरे यांची भेट घेऊन आपल्या मागण्या त्यांच्यासमोर मांडल्या होत्या. याच मुद्यावरून मनसे अध्यक्ष राज ठाकरे यांनी मुख्यमंत्री एकनाथ शिंदे यांची भेट घेऊन वरळी बीडीडी चाळीतील रहिवाश्यांच्या मागण्या सरकारसमोर मांडल्या होत्या. प्रकल्पाच्या आराखड्याबाबत रहिवाश्यांमध्ये संभ्रम असून त्यांच्यासमोर पुनर्विकास प्रकल्पाचे सादरीकरण करावे अशी मागणीही यावेळी राज ठाकरे यांनी मुख्यमंत्र्यांकडे केली होती.

याअनुषंगाने, राज्याचे मुख्यमंत्री यांनी दिलेल्या निर्देशानुसार म्हाडाच्या मुंबई गृहनिर्माण व क्षेत्रविकास मंडळातर्फे वरळी बी.डी.डी. चाळ पुनर्वसन प्रकल्पाबाबत बी.डी.डी. चाळींतील भाडेकरू आणि रहिवासी यांना माहिती देण्याच्या उद्देशाने दि. १२ मे रोजी संध्याकाळी साडेसहा वाजता वरळी येथील जांभोरी मैदान येथे सादरीकरणाचे आयोजन करण्यात आले आहे. वरळी बीडीडी चाळींतील भाडेकरू आणि रहिवासी यांनी या सादरीकरणाला मोठ्या संख्येने उपस्थित रहावे, असे आवाहन मुंबई मंडळाचे मुख्य अधिकारी यांनी केले आहे.