मुंबईः बॉलिवूडमधील ज्येष्ठ गायक मोहम्मद अझीझ यांचे आज (मंगळवार) येथील नानावती रुग्णालयात निधन झाले. ते 64 वर्षांचे होते. बॉलिवूडसह बंगाली व ओडिया चित्रपटांसाठी त्यांनी गाणी गायली होती.

मोहम्मद अझीझ यांचा कोलकता येथे सोमवारी गाण्याचा कार्यक्रम होता. आज (मंगळवार) दुपारी मुंबई विमानतळावर आल्यानंतर त्यांना अस्वस्थ वाटू लागले. उपचारासाठी त्यांना नानावती रुग्णालयात दाखल करण्यात आले होते. हृदय विकाराच्या धक्क्याने त्यांचे निधन झाल्याचे डॉक्टरांनी सांगितले. मुंबईमध्ये त्यांच्या पार्थिवावर उद्या अंत्यसंस्कार करण्यात येणार आहे.

मोहम्मद अझीझ यांचा जन्म 2 जुलै 1954 रोजी पश्चिम बंगालमधील अशोकनगर मध्ये झाला होता. 1980-90 दरम्यान त्यांनी सुपरहिट गाणी गायली. 'आपके आ जाने से...' हे गाणे आजही प्रसिद्ध आहे. ज्येष्ठ अभिनेते अमिताभ बच्चन, गोविंदा, ऋषी कपूर, मिथून चक्रवर्ती व अन्य अभिनेत्यांसाठी त्यांनी प्रामुख्याने गायन केले. गायिका लता मंगेशकर, आशा भोसले, अनुराधा पोडवाल व कविता कृष्णमुर्ती यांच्यासोबत त्यांनी अनेक गाणी गायली. विविध भाषांमधील 20 हजारहून अधिक गाणी त्यांनी गायली आहेत.