कल्याण - कल्याण पूर्वेला पाणी पुरवठा करणारी मुख्य जलवाहिनी आज शनिवार ता 8 डिसेंबर रोजी पहाटे 2 च्या सुमारास फुटल्याने पाणी पुरवठा बंद करण्यात आल्याने नागरिकांना त्रास झाला आहे.

मिळालेल्या माहितीनुसार, दुर्गाडी किल्ल्याजवळ मुख्य जलवाहिनी आज शनिवार ता 8 डिसेंबर पहाटे 2 च्या सुमारास अचानक फुटल्याने लाखो लिटर पाणी रस्त्यावर वाहून गेले. घटनेची माहिती मिळताच पाणी पुरवठा विभागाने पाणी पुरवठा बंद करत जलवाहिनी दुरुस्तीचे काम हाती घेतल्याने कल्याण पूर्व आणि कल्याण पश्चिमेच्या काही भागात आज पाणी पुरवठा बंद ठेवण्यात आला आहे. एकीकडे पाणी समस्या असताना ही घटना घडल्याने दुष्काळात तेरावा महिना अशी गत कल्याण पूर्वकरांची झाली आहे. दरम्यान जलवाहिनी दुरुस्त झाल्यावर पाणी पूरवठा केला जाईल, तो पर्यंत सहकार्य करण्याचे आवाहन पालिकेच्या पाणी पुरवठा विभागाने केले आहे.