Mumbai Weather Update Today : मुंबईत मुसळधार पावसामुळं जनजीवन विस्कळीत झालं असून पावसामुळं हवामान खात्याकडून (Weather Department IMD) ऑरेंज अलर्ट जारी करण्यात आलाय. संपूर्ण शहरात रेल्वे आणि बस सेवांवर मोठा परिणाम झाल्याचं पहायला मिळतंय. कुर्ला, चेंबूर, सायन, दादर आणि अंधेरीसह मुंबईच्या अनेक भागात मुसळधार पावसानं हजेरी लावलीय.

एका अधिकाऱ्यानं सांगितलं की, हवामान खात्यानं (IMD) 1 आणि 2 जुलै रोजी शहरातील काही ठिकाणी मुसळधार पावसाचा अंदाज वर्तवत ऑरेंज अलर्टसह येलो अलर्ट जारी केलाय. मोसमातील पहिल्या मुसळधार पावसामुळं गुरुवारी अनेक सखल भागात पाणी साचल्याचं महापालिका (Mumbai Municipal Corporation) अधिकाऱ्यांनी सांगितलं. हिंदमाता, परेल, हाजी अली, डॉकयार्ड रोड, गांधी मार्केट आणि वांद्रे या भागात अनेक रस्त्यांवर पाणी साचल्यानं रस्ते वाहतूक मंदावली होती. तर, मुसळधार पावसामुळं बीएमसीनं अंधेरी मेट्रो पश्चिम उपनगरातील वाहतूक बंद केल्याचं कळतंय.

दरम्यान, मुसळधार पावसामुळं अनेक भागात पाणी साचलंय. तर, अनेक ठिकाणी लोक गुडघाभर पाण्यातून जाताना दिसत आहेत. अधिकृत आकडेवारीनुसार, गुरुवारी सकाळी 8 ते रात्री 8 वाजेपर्यंत शहरात 119.09 मिमी, पश्चिम उपनगरात 78.69 मिमी आणि पूर्व उपनगरात 58.40 मिमी पाऊस झालाय. शहरातील संततधार पावसामुळं काळबादेवी आणि सायन भागात इमारत कोसळण्याच्या दोन घटना घडल्या आहेत. मात्र, या घटनेमुळं कोणीही जखमी झालं नसल्याची माहिती अधिकाऱ्यांनी दिलीय.