सरळगांव (ठाणे) : थर्माकॉलला बाजूला सारत घरगुती साहित्य वापरून गणेश भक्तांनी गणपतीचे मखर बनविण्यास मुरबाड तालुक्यात प्राधान्य दिल्याचे दिसून येत आहे.       

अनेक वर्ष थर्माकॉल पासून बनवलेले मखर वापरले जात असल्याने सारखेच नक्षीकाम केलेले मखर सर्वच ठिकाणी दिसत असत. पण या वर्षी थर्माकॉलला बंदी असल्याने ग्रामीण भागात घरातीलच चादरी, बेडशीट वापरून मखर बनविल्याचे दिसून येत असल्याने प्रत्येक ठिकाणी मखरांमध्ये  वेगळेपण पाहावयास मिळत आहे.

दरवर्षी थर्माकॉलचे मखर बाजारातून विकत आणायचो मात्र थर्माकॉलला बंदी असल्याने या वर्षी घरातीलच वस्तू वापरून मखर बनविताना जी मजा आली. ती मजा थर्माकॉल मखरात मिळत नव्हती अशी माहिती अनेक गणेश भक्तांनी दिली. शिवळे येथील अशोक खंडागळे यांनी घरातील सफेद कापड वापरून त्यावर शेतकरी करीत असलेल्या आत्महत्या, महिलांवर होणारे अत्याचार, मराठा समाजाचा मोर्चा अशा अनेक घटना या पडद्यांवर रेखाटल्या आहेत.