मुंबई - वीज पुरवठा कंपनीच्या कारवाईच्या निषेधार्थ एका महिलेने सोमवारी संध्याकाळी मंत्रालयासमोर नग्न आंदोलन करण्याचा प्रयत्न केला. आंदोलनकर्त्या महिलेला ताब्यात घेऊन तिला मरीन ड्राइव्ह पोलिस ठाण्यात नेण्यात आले. 30 वर्षांची आरोपी महिला नवी मुंबईतील सानपाडा येथील रहिवासी आहे.

साल 2017 मध्ये, पिडीत महिलेने महाराष्ट्र राज्य वीज कंपनीच्या कार्यालयात तिच्या घराच्या वीज कनेक्शनबाबत आंदोलन केले होते. या आंदोलनामुळे तिच्याविरुद्ध तेव्हा गुन्हा नोंदवण्यात आला होता. या प्रकरणातील तपास अधिकारी तिचा मानसिक छळ करत असून मालमत्ता आपल्या नावावर करण्यासाठी दबाव टाकत असल्याचे महिलेने सोमवारी पोलिसांना सांगितले.

या प्रकरणाची सुनावणी जलदगती न्यायालयात व्हावी, अशी मागणी महिलेने केली आहे. सोमवारी आंदोलनादरम्यान महिलेने सरकारवर महिलांवरील अत्याचाराचा आरोप करणारे बॅनर हातात घेतले होते. पोलिसांनी महिलेला सुरुवातील समुपदेशन करत समजवण्याचा प्रयत्न केला.

परंतु पोलिसांचा प्रयत्न अयशस्वी झाला. मुख्यमंत्र्यांची भेट घेत नाही तोपर्यंत आपले आंदोलन सुरू ठेवण्याचा महिलेने इशारा दिला. तसेच तिने आत्मदहनाची धमकी देखील दिली. अखेर पोलिसांनी अनुचित घटना टाळण्यासाठी तिला ताब्यात घेतले.