विरार : वसई तालुक्यातील (Vasai) सर्वात धोकादायक बनलेल्या चिंचोटी-भिवंडी रस्त्याने काल एका तरुणाचा बळी घेतला. कोल्ही येथे राहणारा तरुण सकाळी कामावर जाण्यासाठी चिंचोटी-भिवंडी रस्त्यावरून (Chinchoti-Bhiwandi Road) पायी निघाला होता. भिवंडीच्या दिशेने जाणाऱ्या भरधाव वेगात असलेल्या टेम्पो चालकाने रस्त्यावर खड्डा चुकवत असताना पुढे चालत असलेल्या तरुणाला पाठीमागून धडक देऊन चिरडले.

या अपघातात तरुणाचा जागीच मृत्यू झाला. मृत्यू झालेल्याचे नाव राहुल कुमार असून तो अवघ्या १८ वर्षाचा होता. या रस्त्यासाठी परिसरातील नागरिक गेल्या काही वर्षांपासून वेगवेगळ्या प्रकारची आंदोलने करत आहेत, परंतु त्यांच्या आंदोलनाला यश मात्र आतापर्यंत आलेले नाही.

चिंचोटी-भिवंडी रस्त्याची चाळण झाली आहे. आता पावसाळ्यात ठिकठिकाणी मोठ-मोठे खड्डे पडले आहेत. त्यातून वारंवार अपघात होत असल्याने रस्ता दुरुस्तीच्या मागणीसाठी कामण-चिंचोटी परिसरातील गावकऱ्यांनी अनेक आंदोलने केली. रस्त्याच्या दुरुस्तीसाठी निधीही मंजूर करण्यात आला आहे. पण, सार्वजनिक बांधकाम विभागाकडून दुरुस्ती केली जात नसल्याने खड्डेमय रस्त्यात वारंवार अपघात होऊन नाहक बळी जात आहेत.

पावसाळ्यात तर खड्ड्यात पाणी साचल्याने वाहन चालकांना खड्ड्यांचा अंदाज येत नसल्याने अपघातांमध्ये वाढ झालेली आहे. या अपघातानंतर संतापलेल्या माजी सरंपच दिनेश म्हात्रे, रमेश जाधव, रविंद्र म्हात्रे, पुष्पा जाधव यांनी रस्त्याच्या दुरुस्तीसाठी आरपारची लढाई लढण्याचा इशारा दिला आहे. या त्रासातून सुटका करण्यासाठी आता गावकरी जेसीबीने रस्ता खोदण्याचे आंदोलन करणार आहेत.