मुंबई - मुंबईतील चेंबूर परिसरात एका 17 वर्षीय मुलाची निर्घृण हत्येची घटना घडली होती. पत्नीशी अनैतिक संबंधाच्या संशयातून आरोपी शफीक शेखने अल्पवयीन ईश्वर मारवाडीची हत्या करून त्याच्या मृतदेहाचे तुकडे केल्याची माहिती तपासात मिळत आहे.

घटनेनंतर या प्रकरणात आरसीएफ पोलिसांनी गुन्हा दाखल करत त्याला तातडीने आरोपीला अटक केली. आरोपीने पोलिसांसमोर ईश्वरची हत्या केल्याची कबुली दिली आहे. सध्या न्यायालयाने आरोपीला पोलीस कोठडी सुनावली आहे.

मिळालेल्या माहितीनुसार चेंबूर परिसरात स्थित म्हाडाच्या इमारतीत आरोपी आणि मृत ईश्वर वास्तव्यास होते. ईश्वरचा आपल्या पत्नीशी अनैतिक संबंध असल्याचा आरोपी शफीकला संशय होता. यामुळे आरोपी शफीकने सोमवारी ईश्वरला घरी भेटण्यासाठी बोलावले होते. घरात दोघांमध्ये कडाक्याचे भांडणं झाले.

वाद विकोपाला जाऊन आरोपी शफीकने ईश्वरच्या मानेवर कोयत्याने वार करून त्याची हत्या केली. एवढेच नाही हत्येनंतर आरोपीने मृतदेहांचे तुकडे करून त्यांना प्लास्टिकच्या पिशव्यांमध्ये भरून ठेवलं. ईश्वर घरी न परतल्याने त्याचे कुटुंबीय आणि मित्र शोध घेत होते.

ईश्वरचा शोध घेत असलेल्या त्याच्या मित्रांना शफीकनेच ईश्वरला गायब केल्याचा संशय आला. त्यानंतर त्यांनी याबाबतची माहिती पोलिसांना दिली. पोलिसांनी घटनास्थळी धाव घेताच आरोपी शफीकनेच ईश्वरची हत्या केल्याचं तपासातून स्पष्ट झालं आहे. पोलिसांना आरोपीच्या घरात ईश्वरच्या मृतदेहांचे तुकडे आढळून आले. त्यानंतर पोलिसांनी तातडीने आरोपी शफीकला अटक केली.