नांदेड : बोधडी (ता. किनवट) येथील सविता माधव श्रीरामवार यांचे निधन झाल्यावर त्यांच्या इच्छेनुसार कन्या रुपाली माधव श्रीरामवार यांनी आईचे देहदान डॉ. शंकरराव चव्हाण शासकीय वैद्यकीय महाविद्यालयात शरीर रचनाशास्त्र विभागात केले आहे.

शासनाच्या देहदान चळवळीमध्ये सर्वांनी सहभागी होण्याचेही आवाहन रुपाली श्रीरामवार यांनी केले आहे. डॉ. शंकरराव चव्हाण शासकीय वैद्यकीय महाविद्यालयाचे अधिष्ठाता डॉ. एस. आर. वाकोडे यांनी याबद्दल श्रीरामवार कुटुंबीयांचे आभार मानले आहेत.

दरम्यान, देहदान केल्यानंतर कुटुंबीयांचे प्रशस्तीपत्र देऊन आभार व्यक्त करण्यात आले. यावेळी डॉ. अनुजा देशमुख, डॉ. अनिस रहेमान तसेच जनऔषधी विभागाचे डॉ. इनामदार, नियोजन अधिकारी डोळे आदी उपस्थित होते. सविता माधव श्रीरामवार यांची देहदान करण्याची इच्छा होती. ती त्यांची कन्या रुपाली माधव श्रीरामवार यांनी पुढे येऊन पूर्ण केली.

त्या एक आशा वर्कर सुपरवायझर आहेत आणि त्यांच्या या कार्याचे सर्व स्तरातून कौतुक होत आहे. कोविडच्या कठीण काळात शरीररचनाशास्त्र विभागात मृतदेह हा स्वीकारता येत नव्हता. त्या कारणाने विभागात मृतदेहाची कमतरता भासत होती. कोविडनंतर देहदानाप्रती जनजागृती निर्माण होऊन बरेचजण आता पुढे येत आहेत.

मृत्यूनंतर देह हा जाळून, पुरुन नष्ट होण्यापेक्षा तो शैक्षणिक कार्यासाठी उपलब्ध करून देणे, हे खऱ्या अर्थाने सामाजिक कार्य आहे. यासाठी नागरिकांनी देहदानाच्या चळवळीत सहभाग घेण्यासाठी पुढे यावे..

- डॉ. एस. आर. वाकोडे, अधिष्ठाता.