नांदेड : राम मंदीर बांधकाम वर्गणी जमा करण्याच्या मिरवणुकीत रामभक्तांसोबत रविवारी (ता. १४) कर्तव्यावर असतांना युनीफाॅर्ममध्ये बेधूंद होऊन डीजेवर ठेका धरणे पोलिस निरीक्षक हनुमंत गायकवाड यांना चांगलाच अंगलट आला. या प्रकरणात पोलिस उपमहानिरीक्षक निसार तांबोळी आणि पोलिस अधीक्षक प्रमोद शेवाळे यांनी गायकवाड यांची नियंत्रण कक्षात रवानगी केली आहे.

रविवारी (ता. १४) फेब्रुवारी रोजी डीजेच्या तालावर ठेका धरलेल्या हदगाव येथील पोलिस निरीक्षक हनुमंत गायकवाड यांनी एका धार्मिक मिरवणुकीमध्ये डीजेच्या तालावर लोकांसोबत ठेका धरला होता. हनुमंत गायकवाड यांच्यावर कारवाई व्हावी अशी मागणी एका निवेदनाद्वारे एमआयएमचे जिल्हाध्यक्ष मिर्झा बेग यांनी नांदेड परिक्षेत्राचे पोलिस उपमहानिरीक्षक आणि पोलिस अधीक्षक यांच्याकडे देण्यात आले होते. या निवदेनाची व श्री. गायकवाड यांच्या ठेक्याची चित्रफित (क्लिप) सोशल माध्यमावर व्हायरल झाल्याने पोलिस खात्याची बदनामी झाली. ही बाब गंभीर असल्याचे व आपल्या कर्तव्यात कसुर केलेल्या गायकवाड यांना नियंत्रण कक्षात पाठविले आहे. 

हेही वाचा - नांदेड : सरपंच दत्ता पाटील पांगरीकर हे धावले महावितरणच्या मदतीला; एक लाख रुपये भरत वीज बिल केले कोरे

श्री. गायकवाड यांनी पोलिस दलात काम करताना कायदा व सुव्यवस्था बाधीत होणार नाही याची जबाबदारी पार पाडणाऱ्यांनीच कायद्याचे उल्लंघन केले. सर्वोच्च न्यायालयाच्या डीजे बंदीचे उल्लंघन करुन ठेका धरलेल्या श्री गायकवाड यांना चांगलाच अंगलट आला. श्री. गायकवाड हे नुकतेच हदगाव पोलिस ठाण्याचे प्रभारी अधिकारी म्हणून रुजू झाले होते. श्री. गायकवाड यांनी धरलेला ठेका अखेर बेसूर झाला.