नांदेड : महावितरणच्या वतीने (Mahavitran Company) विज बिल न भरणाऱ्यास समज देऊन वीजबील भरण्यास सांगितले जात आहे. इतके करुन देखील वीजबील न भरणाऱ्या ग्राहकाचे विज कनेक्शन (Electricity) कापले जात आहे. मंगळवारी (ता.२४) अशाच प्रकारची सिडकोत कारवाई करण्यात आली. दरम्यान संभाजीनगर सिडको (Nanded) येथील एका ग्राहकाने माझी लाईट का बंद केली, असा जाब विचारत महावितरणचे कर्मचारी जनमित्र आकाश दिलीपराव टोमके यांना मारहाण केली. शासकीय कामात अडथळा निर्माण केल्याने त्यांच्या विरोधात गुन्हा दाखल करण्यात आला आहे. काशिनाथ महाजन जोंधळे यांनी अनेक महिन्यांपासून लाईट बिज थकवले होते.

वीजबील वसूली मोहीम सिडको परिसरात राबवत असताना अनेक वेळा वीजबील भरण्याबाबत सूचना दिल्या आहेत. असे असतानाही गेल्या सहा महिन्यापासून एकही रूपया वीजबिल न भरल्यामुळे संभाजीनगर परिसरातील थकबाकीदार वीजग्राहक काशिनाथ महाजन जोंधळे यांचा वीजपुरवठा पोलवरून कट करण्यात आला. जनमित्र आकाश टोमके पोलवरून उतरताच त्यांना माझी लाईट का कट केली असा प्रश्न करत जोंधळे यांनी लाथाबुक्क्यांनी बेदम मारहाण केल्याची जनमित्र आकाश टोमके यांच्या तक्रारीवरुन नांदेड ग्रामीण पोलिस ठाण्यात गुन्हा दाखल करण्यात आला आहे.