नांदेड : जिल्ह्यमध्ये सद्यस्थितीत कोरोनाचा प्रादुर्भाव वाढत असल्याने जिल्हा प्रशासनाच्या वतीने प्रतिबंधात्मक उपाय योजना लागू करण्यात आल्या आहेत. या पार्श्वभुमीवर जिल्ह्यात ता. चार एप्रिलपर्यंत सर्वत्र संचारबंदी लागू करण्यात आली आहे. मात्र महावितरणचे कार्य हे अत्यावश्यक सेवेत मोडत असल्याने महावितरणची सर्व कामे त्याचबरोबर वीज बिल भरणा केंद्र ही सुरु राहणार आहेत. त्यामुळे घरगुती, व्यावसायिक व औद्योगिक ग्राहकांसोबतच इतर सर्व वर्गवारीतील वीज ग्राहकांचे थकित व चालू वीज देयक वसूल करण्याची मोहीम सुरु राहणार आहे.

माहे मार्च 2021 च्या उद्दिष्टानुसार वीज देयक वसुलीचे प्रमाण अतिशय कमी झालेले आहे. त्यामुळे दिलेले उद्दिष्ट पूर्ण करण्यासाठी व मार्चअखेरीस केवळ पाच दिवसाचा कालावधी शिल्लक राहिला असल्याने सर्व जनमित्रांना मोबाईल ॲपच्या माध्यमातून वीज बिल वसुली करण्याच्या सूचना देण्यात आलेल्या आहेत. संचारबंदी च्या निर्बंधांमुळे वीज ग्राहकांना वीज भरणा केंद्रा पर्यंत पोहोचणे शक्य होत नसल्यामुळे जनमित्रांनी थकबाकीदार ग्राहकांच्या घरी जाऊन विज बिल वसुलीसाठी प्रयत्न करावेत अशा सूचना देण्यात आलेले आहेत. वीज बिल वसुली साठी जात असताना सर्व कर्मचाऱ्यांनी आपले कंपनीचे ओळखपत्र सोबत बाळगावे त्याचबरोबर कोवीड-19 च्या संदर्भातील जिल्हा प्रशासनाने निर्गमित केलेल्या सूचना पाळून आवश्यक ती काळजी घेत ग्राहक व स्वतःमध्ये  योग्य ते अंतर राखून वीजबिल वसुलीचे उद्दिष्ट पूर्ण करण्यात यावे असे निर्देश महावितरणने सर्व अधिकारी व कर्मचाऱ्यांना दिले आहेत.

हेही वाचा - शाब्बास परभणी पोलिस शाब्बास : एकाच दिवशी 11 घरफोड्यांचे गुन्हे उघडकीस

कोरोनाचा वाढता प्रादुर्भाव लक्षात घेता वीजग्राहकांना अखंडीत वीजसेवा देण्यासाठी महावितरणचे कोरोना यौध्दा जीवाची बाजी लावत आहेत. त्यामुळे वीजग्राहकांनी योग्य ती खबरदारी घेत वीजबील भरून सहकार्य करावे. ज्या वीजग्राहकांना ऑनलाईन सुविधांचा वापर करणे शक्य आहे अशा सर्व ग्राहकांनी महावितरणने उपलब्ध करून दिलेल्या सुविधांचा घरबसल्या वापर करत वीजबील भरावे असे आवाहन महावितरणने केले आहे.