नांदेड : पर्यावरणाबाबत लोकांमध्ये जागरुकता निर्माण व्हावी, यासाठी पर्यावरण दिवसाचे महत्त्व आहे. निसर्गाशिवाय मनुष्य जीवन शक्य नाही. परंतु माणूस आपल्या स्वार्थासाठी पर्यावरणाला हानी पोहोचवीत आहे. यातून बचाव करण्यासाठी प्रत्येकांनी एक झाड लावून त्याचे संगोपण करावे, असे आवाहन जिल्हाधिकारी डॉ. विपीन यांनी केले.

महसूल वन विभागाचे अधिकारी उपस्थित
जागतिक पर्यावरण दिनानिमित्त जिल्हाधिकारी डॉ. विपीन यांनी शुक्रवारी (ता. पाच) जिल्हाधिकारी कार्यालय परिसरात विविध प्रजातीच्या वृक्षांचे रोपन केले. यावेळी उपवनसंरक्षक आशिष ठाकरे, नांदेड वाघाळा शहर महानगरपालिकेचे आयुक्त डाॅ. सुनील लहाने, अतिरिक्त जिल्हाधिकारी खुशालसिंह परदेशी, निवासी उपजिल्हाधिकारी डाॅ. सचिन खल्लाळ, उपजिल्हा निवडणूक अधिकारी प्रशांत शेळके, उपजिल्हाधिकारी (रोहयो) सदाशिव पडदुणे, उपजिल्हाधिकारी (सामान्य) शरद मंडलिक, उपजिल्हाधिकारी संतोषी देवकुळे यांच्या हस्ते यावेळी वृक्षारोपण करण्यात आले. 

हेही वाचा.....चिमुकल्या हातांनी रेखाटले पर्यावरणाचे महत्व

पर्यावरणाबाबत जागरुकतेसाठी कार्यक्रम
दरवर्षी ता. पाच जून रोजी जागतिक पर्यावरण दिन साजरा करण्यात येतो. पर्यावरणाबाबत लोकांमध्ये जागरुकता निर्माण व्हावी, यासाठी १९७२ पासून जागतिक पर्यावरण दिवस साजरा करण्यात येत आहे. संयुक्त राष्ट्राने १९७२ पासून ता. पाच जून हा जागतिक पर्यावरण दिवस साजरा करण्याचं जाहीर केलं. तेव्हापासून दरवर्षी ता. पाच जून हा जागतिक पर्यावरण दिन म्हणून पाळला जातो, असे डॉ. विपीन यांनी सांगीतले.

हेही वाचलेच पाहिजे....ॲटोसाठी विवाहित महिलेचा छळ

पर्यावरण दिवसाचं महत्त्व
पर्यावरणामुळेच आज मनुष्य, प्राणी-पक्षी, किटक यांचं जीवन शक्य आहे. पर्यावरणाशी संबंधित समस्यांना मानवी चेहरा देण्यासोबतच, लोकांमध्ये पर्यावरणाबाबत जागरुकता निर्माण व्हावी हा या दिवसामागील उद्देश आहे. लोकांमध्ये पर्यावरणाप्रति जागरुकता निर्माण करण्यासाठी संयुक्त राष्ट्रांव्दारे आयोजित केला जाणारा जागतिक पर्यावरण दिवस हा जगातील सर्वात मोठा कार्यक्रम आहे, असे यावेळी सांगण्यात आले. कार्यक्रमास तहसिलदार वैशाली पाटील, ए. बी. बिरादार, विधी अधिकारी आंनद माळाकोळीकर, नायब तहसिलदार सुनिल माचेवाड, जिल्हा एमआयएस समन्वयक रूपेश झंवर, गणेश नरहिरे, सहायक कार्यक्रम अधिकारी प्रसाद डुबूकवाड आदी उपस्थित होते.

घरात राहून पर्यावरण दिवस साजरा कसा करणार?
शक्य असल्यास यंदा आपल्या घरातच छोटी रोपं लावा, वस्तूंचा फेरवापर करण्याबाबत विचार करा आणि आपल्या कुटुंबातील सदस्यांनाही यात सहभागी करा, पॉलिथिनचा वापर शक्यतो करु नका, त्याऐवजी कापडी पिशव्या वापरा, विजेचा कमीत कमी वापर करा, घरातील कोणतीही वस्तू फेकण्याआधी तिचा आणखी कोणत्या प्रकारे वापर होईल का हे पाहा, रस्त्यावर किंवा इतरत्र थुंकू नका आणि इतरांनाही याबाबत सांगा, नव्या पिढीला निसर्ग, पर्यावरण, पाणी तसंच वृक्षांचं महत्त्व समजावून सांगा.