नांदेड : जिल्ह्यात ग्रामपंचायत सार्वत्रिक निवडणुकीची रणधुमाळी सुरु असून याकामी जिल्ह्यातील शिक्षक व इतर कर्मचारी यांना नियुक्त करण्यात आले आहे. परंतु हदगाव तहसीलने आपल्या मर्जीतील कर्मचाऱ्यांना या राष्ट्रीय कामातून वगळले आहे. त्यामुळे अन्य कर्मचाऱ्यांमध्ये संतापाचे वातावरण पसरले आहे. 

निवडणूक काम म्हटलं की अनेक कर्मचारी या कामातून सवलत मिळविण्यासाठी विविध मार्गाचा अवलंब करत असतात. यामध्ये काही जणांनी आपले वजन वापरत निवडणूक कामाचे आदेशच रद्द करुन घेतले असून दरम्यान काही नायब तहसीलदारांनी आपल्या मर्जीतील नातेवाईक व कर्मचारी व शिक्षक यांना या कामात सवलत देऊन उपकार केल्याची चर्चा हदगाव प्रशिक्षणस्थळी होत होती. 

हेही वाचा - फुलांचे निर्माल्य झाले; चिमुकल्यांनो माफ करा, नांदेड परिसरातही भंडाऱ्याच्या घटनेने समाजमन सुन्न

दरम्यान तहसीलदार तथा उपविभागीय अधिकारी जयराज डापकर यांचेकडे व्याधिग्रस्त आजारी शिक्षक महिलांनी निवडणुकांमधून सवलत देण्याची विनंती केली असता त्यांचेकडून कोणाचे आदेश रद्द होणार नसल्याचे स्पष्टीकरण देण्यात आले. मात्र दुसरीकडे त्यांच्याच कार्यालयातील नायब तहसीलदार यांनी आपल्या मर्जीतील अनेक शिक्षक व कर्मचाऱ्यांना परस्पर निवडणुकीच्या कामातून सवलत देऊन त्यांचे आदेश रद्द केल्याची धक्कादायक माहिती समोर आली आहे.

एकीकडे निर्वाचन अधिकारी सर्व कर्मचाऱ्यांनी कामावर हजर व्हावे अन्यथा पोलिस कारवाईस सामोरे जावे लागेल असा इशारा दिला असून दुसरीकडे त्यांच्याच कार्यालयातील नायब तहसीलदार यांनी आपला हातखंडा वापरत मर्जीतील लोकांची सोय करुन दिली आहे. यामुळे अडचणीतील आजारी शिक्षक कर्मचाऱ्यांतून तहसील प्रशासनाबद्दल प्रचंड रोष व्यक्त केला जात आहे. प्रत्येक निवडणुकीमध्ये कामातून सवलत मिळण्यासाठी माहिर असलेल्या अनेक शिक्षक व कर्मचाऱ्यांनी यावेळेस आपला हात धुऊन घेतला असून दूर्धर आजार व आजारी महिला कर्मचाऱ्यांना निवडणूक कामावर निर्दयीपणे जुंपल्यामूळे सदरील कर्मचाऱ्यांतून नाराजी व्यक्त होत आहे.