कुंडलवाडी (जिल्हा नांदेड ) : येथील बँक ऑफ बडोदा या शाखे अंतर्गत असलेल्या महात्मा फुले शेतकरी कर्जमुक्त योजना 2019- 20 मधील पाचशे ते सहाशे शेतकऱ्यांना कर्जमाफीची रक्कम त्यांच्या खात्यावर जमा होऊन बँकेच्या निष्काळजीपणामुळे जमा झालेली रक्कम परत शासनाकडे वर्ग झाल्यामुळे अनेक शेतकरी कर्जमाफी पासून वंचित राहिले. त्यांना त्वरित कर्जमाफीचा लाभ मिळावा व नवीन कर्ज उपलब्ध करुन देण्यात यावे साठी महाराष्ट्र नवनिर्माण सेनेच्या वतीने जिल्हाधिकारी यांना निवेदन देण्यात आले आहे.

कुंडलवाडी येथील बँक ऑफ बडोदा या बँकेच्या अंतर्गत शहर व परिसरातील पाचशे ते सहाशे शेतकऱ्यांनी कर्ज घेतले होते. त्यानंतर शासनाच्या महात्मा फुले शेतकरी कर्जमुक्त योजना 2019- 20 अंतर्गत वरील सर्व शेतकऱ्यांच्या खात्यावर कर्जमाफीची रक्कम जमा ही करण्यात आली. त्यानंतर शेतकऱ्यांनी कर्जमाफीची रक्कम शेतकऱ्यांना देण्यात यावे अशी विनंती बँक अधिकाऱ्याकडे शेतकऱ्यांनी केली. पण बँकेच्या अधिकाऱ्यानी उडवाउडवी करत जमा झालेली कर्जमाफीची रक्कम परत शासनाकडे वर्ग करण्यात आली आहे, अशी माहिती शेतकऱ्यांना देण्यात आली.

हेही वाचा - थकबाकी वसुलीस गेलेल्या महावितरणच्या अभियंत्यास अर्धापूरात मारहाण

त्यामुळे अनेक शेतकरी आजतागायत कर्जमाफीपासून वंचित असून त्यांना कुठलेही आता नवीन कर्ज मिळत नसल्यामुळे शेतकरी कर्जबाजारी झाला आहे. त्यामुळे सर्व शेतकऱ्यांना तात्काळ कर्जमुक्त करुन नवीन कर्ज उपल्बध करुन देण्यात यावे असे निवेदन जिल्हाधिकारी यांच्याकडे महाराष्ट्र नवनिर्माण सेनेच्या वतीने देण्यात आले आहे. या निवेदनावर मनसे शहराध्यक्ष साहेबराव कोंडावार, माधव चंदनकर, नागनाथ वारले, मारोती चंदनकर, ननुबाई घारके, हरिदास काळेकर, शिवमनी नागुलवार, गंगाधर चंदनकर, हुसाजी माहेवार, शिवराम चंदनकर, लक्ष्मण धुप्पे, शंकर दुप्तले, नागराज तुंगेनवार, त्रिशूल चुनडे आदीसह अनेक शेतकऱ्यांच्या स्वाक्षरी आहेत.

संपादन- प्रल्हाद कांबळे