भोकर : शहरातील मध्यवर्ती ठिकाणी असलेल्या केंद्रीय प्राथमिक नूतन शाळेची सुसज्ज इमारत आहे. दुर्गंधीचे कारण सांगून इयत्ता पहिल्या वर्गातील विद्यार्थ्यांना चक्क व्हरांड्यात बसवून ज्ञानार्जन केल जात आहे. गुणवत्तेच्या बाबतीत सुध्दा ‘ढ’ असल्याचे दिसून येत आहे. मुलांचे आरोग्य धोक्यात आले असताना सुद्धा येथील मुख्याध्यापक मात्र मुग गीळून गप्प बसल्याने आश्चर्य व्यक्त केले जात आहे.

मागील दोन वर्षांपासून करोनामुळे शाळेला कुलूप लागले होते. यंदा कुठे शिक्षणाची दारे खुली झाली आहेत. शाळा सुरू होवून जवळपास महिनाभर झाला. तालुक्यातील बहुतांशी शाळेत शिक्षकांची वाणवा आहे. शिक्षक कमी विद्यार्थी अधिक आणि शिक्षक अधिक विद्यार्थी कमी अशी दयनीय अवस्था आहे. बहुतांशी शिक्षक आपल्या सोयीनुसार नांदेडहून अपडाऊन करीत आहेत. त्यामुळे ज्ञानार्जनाकडे लक्ष न देता येण्याजाण्यात अधिक लक्ष असत, गटशिक्षणाधिकारी, विस्तार अधिकारी, मुख्याध्यापक, केंद्र प्रमुख यांनी याकडे लक्ष देणं गरजेच आहे.

अधूनमधून येथील गटशिक्षण अधिकारी शाळेला भेटी देऊन सुचना करतात दौरा संपला की पुन्हा ‘पळसाला पान तीन’ अशी अवस्था आहे. वरिष्ठ अधिकाऱ्यांनी तालुक्यातील शैक्षणिक बाबतीत त्वरीत लक्ष देऊन सुधारणा करावी अशी पालकांची मागणी आहे.

काहीच तोडगा निघाला नाही

शहरातील मध्यवर्ती ठिकाणी असलेल्या नूतन शाळेत इयत्ता पहिली ते सातवी पर्यंत शाळा असून विद्यार्थी संख्या (७००), शिक्षक (३८) आहेत. शाळेची सुसज्ज इमारत बांधण्यात आली आहे. येथील पहिल्या वर्गातील मुलांना चक्क व्हरांड्यात बसवून ज्ञानार्जन केले जात आहे. याबाबत चौकशी केली असता शाळेच्या छतावर मुल, मुली लघूशंका करीत असल्याने शाळेच्या खोलीत दुर्गंधीमुळे आरोग्य धोक्यात आले अशी माहिती मिळाली. या बाबतीत येथील शिक्षकांनी मुख्याध्यापिकास कल्पना दिली पण काहीच तोडगा निघाला नाही. नाईलाजास्तव मुलांना व्हरांड्यात बसवावे लागत आहे.

शाळेत सुविधांचा अभाव

येथील नूतन शाळेत ईमारत बांधकाम करताना विद्यार्थ्यांसाठी स्वतंत्र मुतारी बांधण्यात आली. तीथे पाण्याची व्यवस्था नसल्याने घाण साचली आहे. स्वच्छतागृहाचे दरवाजे नादुरूस्त आहेत. नियमीत देखभाल दुरुस्ती केली जात नाही. पिण्याच्या पाण्याची व्यवस्था नाही. शाळा परिसरात पाण्याचे डबके साचले आहे. तणानी डोके वर काढले आहे. शिक्षकावर कसलाच अंकुश नाही. याकडे कुणीच लक्ष देत नाही.