नांदेड : शहर आणि जिल्ह्यातील सार्वजनिक ठिकाणाहून आणि बाजारातून हरवलेले, गहाळ आणि चोरी झालेले तब्बल १२ लाख ८२ हजार नऊशे रुपयांचे ८० मोबाईल सायबर शाखेने हस्तगत केले. त्यानंतर त्याची शहानिशा करून संबंधितांना ते मोबाईल पोलिस अधीक्षक श्रीकृष्ण कोकाटे यांच्या उपस्थितीत देण्यात आले आहेत.

शहर आणि जिल्ह्यात आठवडी बाजार, बसस्थानक, रेल्वेस्थानक आदी सार्वजनिक ठिकाणाहून महागडे मोबाईल गहाळ, हरवले तसेच चोरी होत आहेत. त्यामुळे या मोबाईलचा शोध घेण्यासाठी पोलिस अधीक्षक श्रीकृष्ण कोकाटे यांनी सायबर शाखेचे पोलिस निरीक्षक नानासाहेब उबाळे यांना आदेशित केले होते. त्यानुसार सायबर सेलचे एक पथक आणि जिल्ह्यातील सर्व उपविभागाचे पथक तयार करून हरवलेल्या मोबाईलचा शोध घेण्याची मोहिम राबविण्यात आली होती.

या पथकाने तसेच स्थानिक गुन्हे शाखेच्या पथकाने अशा मोबाईलचा शोध वेगवेगळ्या ठिकाणी जाऊन घेतला आणि ८० मोबाईल हस्तगत केले

आहेत.

त्या मोबाईलचे एकत्रिरित्या वाटप करण्यात आले. तसेच ज्यांचे मोबाईल हरवले आहेत त्यांनी मोबाईलचे आयएमइआय क्रमांकाची खात्री करून घेऊन जाण्याचे आवाहन सायबर सेलकडून करण्यात आले आहे.

सदरील कार्यवाही पोलिस अधीक्षक कोकाटे, अतिरिक्त पोलिस अधीक्षक अबिनाश कुमार, डॉ. खंडेराय धरणे, गृह विभागाचे पोलिस उपअधीक्षक डॉ. अश्विनी जगताप यांच्या मार्गदर्शनाखाली पोलिस निरीक्षक द्वारकादास चिखलीकर, प्रशांत देशपांडे, नानासाहेब उबाळे, फौजदार जी. बी. दळवी, सोपान थोरवे, पोलिस अंमलदार सुरेश वाघमारे, राजेंद्र सिटीकर, दीपक ओढणे, विलास राठोड, रेश्मा पठाण, अनिता नलगोंडे, दाविद पिडगे, दीपक शेवाळे, मोहन स्वामी, किशोर जैस्वाल, काशीनाथ कारखेडे, व्यंकटेश सांगळे, सौरभ सिद्धेवार आदींनी पार पाडली.