नांदेड : नांदेड वाघाळा महापालिकेच्या स्थापनेला २५ वर्षे पूर्ण झाल्यानिमित्त रौप्य महोत्सवाचे ता. २९ एप्रिल ते ता. एक मे असे तीन दिवस नांदेडकरांसाठी सांस्कृतिक कार्यक्रमांचे आयोजन करण्यात आले आहे. त्याचबरोबर पद्मश्री डॉ. रमण गंगाखेडकर यांना जीवन गौरव पुरस्काराने सन्मानित करण्यात येणार आहे.महापालिकेच्या वतीने शनिवारी (ता. १६) दुपारी दोन वाजता हॉटेल विसावा येथे आयोजित पत्रकार परिषदेत महापौर जयश्री निलेश पावडे यांनी ही माहिती दिली.

यावेळी विधान परिषदेतील कॉँग्रेसचे गटनेते आमदार अमर राजूरकर, माजी पालकमंत्री डी. पी. सावंत, आमदार मोहन हंबर्डे, उपमहापौर अब्दुल गफार, सभागृह नेते महेश कनकदंडे, स्थायी समितीचे सभापती किशोर स्वामी, अतिरिक्त आयुक्त बाबासाहेब मनोहरे, गिरिष कदम, उपायुक्त डॉ. पंजाब खानसोळे, माजी उपमहापौर आनंद चव्हाण, तालुकाध्यक्ष निलेश पावडे, प्रवक्ते मुन्तजीब, नगरसेविका मुळे, श्री. शंकतीर्थकर आदी उपस्थित होते.

मागील दोन वर्षे कोरोनामुळे महापालिका वर्धापन दिन साजरा करता आला नाही. यंदा २५ वर्षे पूर्ण झाल्याबद्दल रौप्य महोत्सव साजरा करण्याचे नियोजन करण्यात आले आहे. उल्लेखनीय कार्य केल्याबद्दल निवड समितीच्या शिफारशीनुसार पद्मश्री डॉ. रमण गंगाखेडकर यांची जीवन गौरव पुरस्कारासाठी निवड करण्यात आली असल्याची माहिती आमदार राजूरकर यांनी दिली. एक लाख रुपये रोख, सन्मानचिन्ह, पुष्पहार, शाल व श्रीफळ देऊन त्यांचा सत्कार करण्यात येणार आहे.

राज्याचे सार्वजनिक बांधकाम मंत्री तथा पालकमंत्री अशोक चव्हाण यांच्या मार्गदर्शनाखाली नियोजन करण्यात येत आहे. सदरील कार्यक्रमासाठीचा निधी जिल्ह्यातील विधानसभा आणि विधानपरिषद सदस्य यांच्याकडून स्थानिक विकास निधी अंतर्गत उपलब्ध करून देण्यात येणार आहे. त्यासाठी पालकमंत्री चव्हाण यांनी संमती दर्शवली आहे. त्यानुसार जिल्हाधिकारी यांच्याकडे शिफारस करण्यात येणार आहे.