सांगली-कोरोना विषाणूचा वाढता प्रादुर्भाव लक्षात घेता शासकीय वैद्यकीय महाविद्यालय व रुग्णालय मिरज येथे कोरोना रुग्णालय म्हणून घोषित करण्यात आले आहे. या रुग्णालयात दाखल होणाऱ्या रुग्णांवर उपचार करण्यासाठी अत्यावश्‍यक असणाऱ्या साधन सामग्रीसाठी जिल्हा वार्षिक योजना सन 2019-20 अंतर्गत जिल्हा प्रशासनाने 77 लाख 71 हजार 860 रुपयांचा निधी उपलब्ध करून दिला आहे, अशी माहिती जिल्हाधिकारी डॉ. अभिजित चौधरी यांनी दिली. 

कोरोना प्रादुर्भाव रोखण्यासाठी जिल्ह्याला आवश्‍यक तो सर्व निधी उपलब्ध करून दिला जाईल, असा दिलासा पालकमंत्री जयंत पाटील यांनी दिला होता. जिल्ह्यात ज्या वैद्यकीय साधन सामग्रीची आवश्‍यकता आहे, अशांचा आढावा घेऊन जिल्हा वार्षिक योजनेतून प्रशासनाने जिल्हा शल्य चिकित्सक डॉ. संजय साळुंखे यांना 77 लाख 71 हजार 860 रुपयांचा निधी उपलब्ध करून दिला आहे. निधीतून व्हेंटीलेटर, मल्टी पॅरा मॉनिटर, ईसीजी मशिन, सक्‍शन मशिन, टोक्‍लेव्ह मशिन, आरओ प्लॅंट, स्टीम स्क्रबर मशिन, बॅटरी स्प्रेअर वुईथ फ्रॉगर मशिन, एन-95 मास्क, लॅटेक्‍स हॅंडग्लोज, गॉगल्स, पीपीई कीट आदी अद्ययावत साधन सामग्री खरेदी करण्यात येणार आहे.

तसेच टोमेटेड न्युक्‍लिक सीड एक्‍सट्रॅक्‍शन सिस्टीमसाठी 14 लाख 87 हजार रुपयांची मागणी प्रस्तावीत आहे. वैद्यकीय साधन सामग्रीमुळे कोरोना बाधित रुग्णांवर करण्यात येणाऱ्या उपचारांसाठी मोठ्या प्रमाणावर मदत होणार आहे. अधिक सक्षम होणार असल्याचे मत जिल्हाधिकारी डॉ. चौधरी यांनी व्यक्त केले. जिल्हा वार्षिक योजनेतून निधीची उपलब्धता करून दिल्याबद्दल मिरज वैद्यकीय महाविद्यालय व रुग्णालयाचे अधिष्ठाता डॉ. सुधीर नणंदकर, ग्रॅंट शासकीय वैद्यकीय महाविद्यालय मुंबईच्या अधिष्ठाता डॉ. पल्लवी सापळे यांनी पालकमंत्री व प्रशासनाने आभार व्यक्त केले आहेत.