नागठाणे - देशाला आजवर हजारों सैनिक देणाऱ्या अपशिंगे (मिलिटरी, ता. सातारा) गावात काश्मीरमधील घटनेनंतर आज वातावरण सुन्न होते. 

अपशिंगे म्हणजे सैनिकांचे गाव. आजही येथील युवापिढीचा सैनिकी परंपरेकडे असलेला ओढा कायम आहे. त्यामुळे दरवर्षी मोठ्या संख्येने गावातील युवक सैन्यात भरती होतात. त्यातील बहुतेक सेवेच्या पहिल्या टप्प्यात सीमेवर कार्यरत असतात. सध्याही येथील सैनिक सीमेवर असणाऱ्या वेगवेगळ्या युनिटमध्ये सहभागी आहेत. 'सीआरपीएफ'मध्ये कार्यरत असलेल्या गावातील सैनिकांची संख्या चाळीसच्या घरात आहे. काश्मीरमधील घटनेनंतर गावात सुन्न वातावरण होते. सैनिकांच्या कुटुंबियातही अस्वस्थता होती. संपर्क साधण्याच्या दृष्टीने फोन सुरु होते. या घटनेनंतर संतापही व्यक्त होत होता.

जम्मू काश्मीरमध्ये घडलेली घटना दुर्दैवी व संतापजनक आहे. अशा घटना सातत्याने घडताना दिसतात. त्यामुळे त्यावर कायमस्वरूपी उपाय शोधण्याची वेळ येऊन ठेपली आहे. कोणताही राजकीय मुद्दा न करता अतिरेक्यांचा कायमचा बीमोड होण्याची गरज आहे. अशी प्रतिक्रिया येथील सामाजिक कार्यकर्ते हेमंत निकम यांनी व्यक्त केली. 

अपशिंगेत आज बंद
दरम्यान, आज येथील प्राथमिक शाळेतील विद्यार्थ्यांनी शहीदांना श्रद्धांजली वाहिली. उद्या (शनिवारी) गावातील बाजारपेठ बंद ठेवण्याचा निर्णय घेण्यात आला आहे.